हेटौंडा (हाम्रो खेलकुद) – एपिएफ र चन्द्रागिरी नगरपालिका न्यु डायमण्ड युथ स्पाेर्टस् क्लबबीच हेटौंडामा जारी केशवलाल स्मृति खुल्ला राष्ट्रिय महिला भलिबल प्रतियोगिताको उपाधिका‌ लागि प्रतिस्पर्धा हुने भएको छ।

लिगमा अपराजित रहेको एपिएफ ११ अंकका साथ शीर्षस्थानमा रहँदै फाइनल पुगेको हो । ७ अंक जोडेको न्यु डायमण्ड अन्तिम खेलअघि उपाधि नजिक पुगेकाे हाे । एपिएफले लिगको आफ्नो अन्तिम खेलमा आइतबार नेपाल पुलिस क्लबलाई ३-१ को सेटमा हरायो ।

शुक्रबार त्रिभुवन आर्मी क्लबलाई ३–० को सोझो सेटमा हराउँदै जितकाे यात्रा सुरूवात गरेको एपिएफले शनिबार घरेलु टोली छहारी युवा क्लबलाई ३–० काे सोझो सेटमा तथा न्यु डायमण्डमाथि ३–२ काे प्रतिस्पर्धात्मक जित निकाल्दै अपराजित रहेर फाइनलकाे यात्रा तय गर्न सपःल भयाे ।

आइतबार अर्को खेलमा न्यु डायमण्डले आर्मीलाई ३-१ काे सेटमा हरायो । पहिलो दिन शुक्रबार पुलिसलाई ३–१ ले हराएको न्यु डायमण्ड शनिबार एपिएफसँग ३–२ काे प्रतिस्पर्धात्मक सेटमा पराजित भएको थियो।

आइतबारका लागि तय न्यु डायमण्ड र छहारीको खेल सोमबार हुनेछ । ५ टोलीको सहभागिता रहेको प्रतियोगिताबाट छहारीसँगै पुलिस र बाहिरिसकेका छन् । फाइनल सोमबार दिउँसो हुनेछ । प्रतियोगिताको उपाधि विजेताले उपाधिसहित २ लाख र दोस्रो हुने टोलीले १ लाख रुपैयाँ प्राप्त गर्नेछ ।

मकवानपुर जिल्ला खेलकुद विकास समितिले आयोजना गरेको खेलकुद तथा व्यापार महोत्सवमा मकवानपुर जिल्ला भलिबल संघ र केशवलाल स्मृति केन्द्रीय प्रतिष्ठानको संयुक्त आयोजना प्रतियोगिता सन्चालन भएको हो । हेटौंडा उपमहानगरपालिकाले प्रतियोगितालाई प्रायोजन गरेको हो ।