राष्ट्रिय भारोत्तोलन अर्को साता हुने

काठमाडौं (हाम्रो खेलकुद)- नेपाल भारोत्तोलन संघको आयोजनामा अर्को साता २६ औं पुरुष तथा ११ औं महिला राष्ट्रिय भारोत्तोलन प्रतियोगिता हुने भएको छ ।

प्रतियोगिताको पुस २४ गतेदेखि हुने आइतबार मध्यपुर थिमीस्थित थिमी बैंक्युटमा आयोजित पत्रकार सम्मेलनमा जानकारी दिइएको छ ।

पुरुष/ महिलातर्फ सिनियर, जुनियर र युथमा समान १० स्वर्ण पदकका लागि प्रतिस्पर्धा हुने आयोजक भारोत्तोलन संघका अध्यक्ष रामकृष्ण श्रेष्ठ (बोस) ले जानकारी गराए । प्रतियोगितामा करिब २ सय ५० खेलाडीको सहभागिता रहने छ ।

प्रतियोगिता अन्तर्राष्ट्रिय भारोत्तोलन महासंघ, एसियाली भारोत्तोलन महासंघ र नेपाल भारोत्तोलन संघको नियम अनुसार खेलाइने बताइएको छ ।

मध्यपुर थिमीस्थित थिमी बैंक्युटमा ३ दिनसम्म हुने प्रतियोगिता सञ्चालनका‌ लागि करिब ८६ लाख रुपैयाँ खर्च हुने अनुमान गरिएको आयोजकले जनाएको छ ।