सुभाषले जिते भारतको प्रतिष्ठित उपाधि

काठमाडौं (हाम्रो खेलकुद) – नेपालका शीर्ष एमेच्योर गल्फर सुभाष तामाङले भारतको प्रतिष्ठित आइजीयु एमेच्योर गल्फ च्याम्पियनसिपको १ सय २२ औं संस्करणको उपाधि जितेका छन् ।

म्याच प्ले फर्म्याटमा भएको प्रतियोगिताको फाइनलमा सुभाषले भारतका रोहितलाई पराजित गर्दै उपाधि जितेका हुन् । उनले ९ एण्ड ७ को स्कोरका साथ भारतमा उपाधि जितेका हुन् । ३६ होलमा खेलिएको फाइनल खेलको २९ औं होलमा ९ होलको अग्रता बनाएपछि सुभाषले उपाधि पक्का गरे ।

सुभाषले यसअघि शनिबार दक्षिण अफ्रीकाका एल्टिन भान डर मर्वलाई हराएका थिए । त्यसअघि सुभाषले पहिलो चरणमा भारतका कानव चौहान, प्रि क्वाटरफाइनलमा विशेष शर्मा र क्वाटरफाइनलमा ध्रुव शुरीलाई पराजित गरेका थिए ।

सुभाष अघिल्लो वर्षदेखि भारतको बेंगलोरस्थित तरुण सर्देशाई गल्फ एकेडेमीमा प्रशिक्षण गर्दै आएका छन् । नेपालका लागि एसियाली खेलकुदमा सहभागिता जनाएका उनले भारतमै खेल्न यसपटक सूर्य नेपाल गल्फ टुरको पहिलो प्रतियोगिता गुमाएका थिए ।