हेटौंडा (हाम्रो खेलकुद)- हेटौडा कप एसियाली खुल्ला बुद्धिचाल प्रतियोगिता बुधबार सुरु भएको छ ।

पहिलो चरणको खेलमा भारतीय सुबयण कुण्डु, बंगलादेशी आइएम अबु सुफियन सकील, आइएम महमद मिजाउँदिन, एफएम शेख नाजिर, एफएम देवराज चटर्जी, एफएम महमद सरिफ हुसैन, एफएम नाएम हक, भारतीय एफएम अर्विन्देर प्रीत सिंह, राहुल गुरुङ, श्रीलंकन डब्लुआइएम सचिनी राणाशिंघे, नेपाली पुरुषोत्तम सिलवाल, एआईएम सुश्रुत दाहाल लगायत सबै शीर्ष खेलाडीहरूले जितेका छन् ।

नेपाल खेलकुद महासंघ, हेटौडा चेस क्लब र मकवानपुर जिल्ला बुद्धिचाल संघको संयुक्त आयोजनामा भएको प्रतियोगितामा नेपालका पुरुषोत्तम सिलवाल, शुश्रुत दाहाल , धिरेन राई र टेक राईले पनि सफलता हाँसिल गरेका छन्।

त्यसैगरी पूर्व नेपाल च्याम्पियन सिएम पुरुषोत्तम चौलागाई भारतीय खेलाडी पियुस कुमारसँग बराबरीमा रोकिए । नेपाल च्याम्पियन एफएम रुपेश जैसवाल भारतीय १४३३ रेटिङ पंकज बोर्सेसंग पराजित भए।

नेपाल ,भारत, श्रीलंका र बंगलादेशका खेलाडीहरुको सहभागिता रहेको प्रतियोगिताको प्रदेश खेलकुद विकास परिषद, बागमतीका सदस्य सचिव सूर्य लाल भण्डारी र प्याब्सन बागमती प्रदेशका अध्यक्ष केशवलाल श्रेष्ठले संयुक्तरूपमा चेस गोटी चालेर उद्घाटन गरे।

मकवानपुर जिल्ला खेलकुद विकास समितिका अध्यक्ष भेस खड्गीले सफलताको शुभकामना दिए । सदस्य सचिव भण्डारीले बागमती प्रदेश स्तर मै चेसलाई पाठ्यक्रममा राख्न आफू लागि रहेको जानकारी दिए।