काठमाडौं (हाम्रो खेलकुद)- दोलाखाका आशिष फुयालले शनिबार राष्ट्रिय खुुुुल्ला र्यापिड बुुुुद्धिचाल प्रतियोगिताको उपाधि जितेका छन्।

आशिषले पूर्व नेपाल च्याम्पियन बद्रीलाल नेपालीसंग नवौं चरणको खेलमा बराबरी खेलि साढे ७ अंक सहित उपाधि जितेका थिए। उपाधिसहित उनले २५ हजार रुपैयाँ पाए।

७ अंक जोडेका बद्री दोस्रो स्थानमा रहे । बद्रीले १५ हजार रुपैयाँ पाए । ललितपुरका सरोज महर्जनको पनि ७ अंक नै भए पनि बद्रीसंग ट्राइ बेकरमा पछि रहेर तेस्रो स्थान रहे । १० हजार रुपैयाँ प्राप्त गरेका उनले नवौ चरणको खेलमा श्री कृष्ण श्रेष्ठलाई पराजित गरेका थिए।

फिडे मास्टर क्षितिज भण्डारी चौथो स्थानमा र वर्तमान नेपाल च्याम्पियन रुपेश जैसवाल पाँचौ स्थानमा रहे । केशवले ८ हजार र रुपेशले ७ हजार रुपैयाँ पुरस्कार पाए।

काठमाडौका सुदिप तामाङ छैठौ , केशव श्रेष्ठ सातौं , ललितपुर स्पोर्ट्स क्लबका कुसल बेलबासे आठौं, ललितपुरका सानुराज बज्राचार्य नवौ र काठमाडौका हेमराज भण्डारी दसौं भए।

शंखरापुर युथ क्लबको आयोजनामा संचालन भएको प्रतियोगितामा काठमाडौका नवीन तण्डुकार भेट्रानतर्फको उपाधि जिते । अनरेटेडमा विजेश राजकर्णिकार पहिलो स्थानमा रहे।

त्यसैगरी महिलातर्फ पुर्णिमा गुरुङ प्रथम र सिन्दिरा जोशी दोस्रो भइन् । यु १२ मुनि काठमाडौका एन्जेल महर्जन , यु१४ बर्ष मुनि अध्यन्त काफ्ले र यु १६ तर्फ प्रज्वल चौलागाईं विजयी भएका छन्।

शंखरापुर युथ क्लबका कृष्णभक्त श्रेष्ठका सभापतित्वमा भएको समापन समारोहमा शंकरापुर नगरपालिका प्रमुख रमेश नापित, उप प्रमुख संमिता श्रेष्ठ , बुद्धिचाल महासंघका कार्यवाहक अध्यक्ष हेराकाजी महर्जन लगायतले विजेता खेलाडीहरुलाई पुरस्कृत गरेका थिए। ३५ जिल्लाका ८८ खेलाडीले प्रतियोगितामा भाग लिएका थिए ।