सुबास हुमागाईं, हाङ्गचौ

नेपाली राष्ट्रिय महिला कबड्डी टोलीले चीनमा जारी १९ औं एसियाली खेलकुद (एसियाड) मा कम्तीमा कास्य पदक जित्ने पक्का भएको छ ।

समूहको अन्तिम खेलमा बुधबार इरानले बंगलादेशलाई ५४–१६ ले हराएसँगै नेपाल समूह उपविजेताका रुपमा सेमिफाइनल पुगेको हो । सेमिफाइनलमा पराजित हुने दुवै टोलीले पदक पाउने भएकाले नेपालले कम्तीमा कास्य पदक पक्का गरेको हो । नेपालले सेमिफाइनल जितेमा स्वर्ण पदकका लागि प्रतिस्पर्धा गर्नेछ ।

आफ्नो पहिलो खेलमा बंगलादेशलाई ३७–२४ ले हराउँदै नेपालले अघिल्लो चरणको यात्रा बलियो बनाएको थियो । साविक विजेता समेत रहेको इरानसँग नेपालले मंगलबार ४३-१९ को हार बेहोरेको थियो ।

अब नेपालले सेमिफाइनलमा भारत वा चाइनिज ताइपेइमध्य एक टोलीसँग खेल्नेछ । बुधबार साँझ समूह ए को बाँकी खेल सम्पन्न भएपछि नेपालको प्रतिद्वन्द्वी थाहा हुनेछ । सेमिफाइनल खेल शुक्रबार विहान हुनेछ ।

नेपाली कबड्डी टोलीले सरकारबाट प्राथमिकता नपाउँदा निकै कष्ट गरेर तयारी गरेको थियो । पछिल्लो एक महिना भारतको हरियाणा पुगेर धर्मशालामा प्रशिक्षण गरेको टोली नेपालका लागि पहिलो एसियाली खेलकुद सहभागितामै पदक जित्न सफल भएको हो ।