काठमाडौं (हाम्रो खेलकुद) – नेपाल एपिएफ क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब लिग प्रतियोगितामा दावाली मिलन क्लबलाई सोझो सेटमा पराजित गर्दै विजयी सुरुवात गरेको छ । एपिएफले दावालीलाई २५-२२, २५-१३ र २५-२३ ले हराउँदै तीन महत्वपूर्ण अंक बटुलेको छ ।

त्यसअघिको खेलमा नेपाल पुलिस क्लबले गण्डकी प्रदेशमाथि ३-२ को रोमान्चक जित हात पारेको थियो । पुलिसले गण्डकीलाई २५-२१, २५-१६, १३-२५, २४-२६ र १५-१० को सेटमा पराजित गरेको थियो ।

त्यसअघि आज भएको पहिलो खेलमा त्रिभुवन आर्मी क्लबले सैलुङ बागडुङ्गा स्पोर्ट्स क्लबलाई ३(० को सोझो सेटमा पराजित गर्यो । आर्मीले सैलुङलाई २५-८, २५-१३ र २५-१७ ले पराजित गरेको हो ।

आजनै भएको महिलातर्फ पहिलो खेलमा नेपाल पुलिस क्लबले गण्डकी प्रदेशलाई २५–१०, २५–१०, २५–११ ले पराजित गर्दै विजयी सुरुवात गरेको थियो । पुरुषतर्फ प्रतियोगितामा टिप टम हेल्प नेपाल स्पोर्ट्स क्लब, त्रिभुवन आर्मी क्लब, नेपाल एपिएफ क्लब, नेपाल पुलिस क्लब, गण्डकी प्रदेश, दावली मिलन क्लब र सैलुङ बागढुङ्गा स्पोर्ट्स क्लब छन् ।

महिलातर्फ नेपाल पुलिस क्लब, त्रिभुवन आर्मी क्लब, होङ्गान्जी न्यू डायमण्ड स्पोर्ट्स क्लब, नेपाल एपिएफ क्लब, गण्डकी प्रदेश र एभरेष्ट भलिबल टेक्निकल सेन्टर छन् । महिला र पुरुष दुवैतर्फको शीर्ष दुई टोली फाइनल खेल्नेछन् ।