काठमाडौं (हाम्रो खेलकुद)- नेपाल राष्ट्रिय गल्फ टोलीका खेलाडी सदभाव आचार्यले एएसी एकेडेमीमा उत्कृष्ट सर्ट गेमको अवार्ड जितेका छन् ।

जुन ११ देखि १६ सम्म बैंककको अमाता स्प्रिङ कन्ट्री क्लबमा एसिया प्यासिफिक एमेच्योर च्याम्पियनसिपले आयोजना गरेको सप्ताहव्यापी एकेडेमीको समापन समारोहमा सदभावले अवार्ड प्राप्त गरेका हुन् ।

सदभावलाई नेपाल गल्फ संघ मार्फत एसिया प्यासिफिक एमेच्योर च्याम्पियनसिपले तालिमका लागि निमन्त्रणा गरेको थियो । कोचिङ, खेलकुद विज्ञान, फिटनेस र अन्य क्षेत्रहरूमा विशेषज्ञहरूको टोलीले सहभागीहरूको लागि तालिमका सत्रहरू सञ्चालन गरेका थिए। खेलका विभिन्न पक्ष, डाटा एनालाइजिङ, ट्र्याकम्यान र क्लब फिटिङबारे पाठ सिक्नुका साथै गल्फरहरूले अमाता स्प्रिङमा गल्फ खेलेका थिए।

एएसी एकेडेमीले खेलाडीहरूको क्षमता र सीप अभिवृद्धि गर्न र अक्टोबर २६ देखि २९ सम्म अस्ट्रेलियाको रोयल मेलबर्न गल्फ क्लबमा हुने एसिया प्यासिफिक एमेच्योर च्याम्पियनसिपको लागि तयारी गरेको हो।

नेपाल नम्बर १ एमेच्योर गल्फर सुवास तामाङले मे महिनामा मेलबर्नको एएसी एकेडेमीमा भाग लिएका थिए। सुवास र सद्भावले अस्ट्रेलियामा हुने एसिया प्यासिफिक एमेच्योर च्याम्पियनसिपमा भाग लिनेछन् । उनीहरु यसै वर्ष चीनको हाङझाउमा हुने १९ औं एसियाली खेलकुदका लागि पनि टोलीमा छन् ।