काठमाडौं (हाम्रो खेलकुद)- टर्किस एयरलाइन्स वल्ड गल्फ कप आइतबार गोकर्ण गल्फ क्लबमा हुने भएकाे छ। स्टेबलफोर्ड ३/४ ह्यान्डिक्याप फरम्यटमा हुने प्रतियोगितामा कर्पोरेट क्षेत्रका ८० जना गल्फ खेलाडीले प्रतिस्पर्धा गर्नेछन्।

नेटतर्फको विजेता डिसेम्बरमा अन्टाल्याको ग्लोरिया सेरेनिटी रिसोर्टमा आयोजना हुने टर्किस एयरलाइन्स विश्व गल्फ कप ग्रान्ड फाइनलका लागि छनोट हुने बुधबार आयोजित पत्रकार सम्मेलनमा गोकर्ण गल्फ क्लबका वरिष्ठ गल्फ निर्देशक दीपक आचार्यले बताए। यो प्रतियोगिता विश्व कर्पोरेट गल्फ कै ठुलो प्रतियोगिता हो।

टर्किस एयरलाइन्सले विभिन्न ५७ देशको ८५ स्थानमा प्रतियोगिता आयोजना गर्नेछ। ८५ स्थानमा भएका विजेताहरूले अन्टाल्याको ग्लोरिया सेरेनिटी रिसोर्टमा
आयोजना हुने टर्किस एयरलाइन्स विश्व गल्फ कप ग्रान्ड फाइनलमा आ आफ्नो देशको प्रतिनिधित्व गर्नेछन्।

यो प्रतियोगिता नेपालमा हुन लागेको तेस्रो पटक हो। यसअघि सन् २०१८ र २०१९ मा प्रतियोगिता भएको थियो। २०१८ र २०१९ का विजेता माधव आचार्य र बाबु शेर्पाले फाइनलमा नेपालको प्रतिनिधित्व गरेका थिए। यसपछि कोरोनाको कारण प्रतियोगिताले निरन्तरता पाउन सकेन। तर यो प्रतियोगितालाई निरन्तरता दिने टर्किस एयरलाइन्सका महाप्रबन्धक सेर्कन बसरले बताए।

प्रतियोगिताका विजयी खेलाडीहरुलाई स्वर्ण, रजत र कास्य ट्रफी प्रदान गरिनेछ। यो पटक महिला खेलाडीहरूको लागि छुट्टै विधा राखिएको छैन। महिला खेलाडीले पनि प्रतियोगिता जितेर टर्किस एयरलाइन्स विश्व गल्फ कप ग्रान्ड फाइनलमा‌स्थान बनाउने अवसर रहेको छ। यसैगरी महिला र पुरुष खेलाडीको लागि क्लोजेस्ट टु दि पीनको पुरस्कार पनि राखिएको बताइएको छ।