झापा (हाम्रो खेलकुद) – नेपाल खेलकुद पत्रकार मञ्च एनएसजेएफ झापाको अध्यक्षमा इन्द्रजित मुखिया निर्विरोध चयन भएका छन् ।

शनिबार बिर्तामोडमा भएको मञ्चको जिल्ला समन्वय शाखाको तेस्रो अधिवेशनले मुखियासहित कार्यसमिति सर्वसम्मत चयन भएको छ । मञ्चको उपाध्यक्षमा प्रेम आचार्य र सचिवमा चिरन्जिवी घमिरे छन् । सहसचिवमा भूमिका सुब्बा र कोषाध्यक्षमा प्रकाश बानियाँ चयन भएका छन् ।

सदस्यहरुमा रोहित काफ्ले, तीर्थ तिम्सिना, विष्णु श्रेष्ठ, तिलक योञ्जन, नारायण अर्याल र आयुष निरौला छन् । जिल्ला फुटबल संघ, झापाका अध्यक्ष भगीरथ आले नेतृत्वको निर्वाचन समितिले निर्वाचित पदाधिकारी तथा सदस्यको नाम घोषणा गरेका थिए ।
त्यसअघि कोशी प्रदेश खेलकुद बोर्डकी उपाध्यक्ष जीना कार्कीले अधिवेशनको उद्घाटन गरेकी थिइन् ।

कार्यक्रममा जिल्ला खेलकुद विकास समितिका अध्यक्ष भेषराज भण्डारी, नेपाल खेलकुद पत्रकार मञ्चका केन्द्रीय महासचिव प्रज्वल ओली, भद्रपुर झापा गोल्डकपका अध्यक्ष दीपेश ढकाल, झापा जिल्ला उसु संघका अध्यक्ष राजेन्द्र घिमिरे नेपाल पत्रकार महासंघ झापाका अध्यक्ष एकराज गिरी लगायतले अधिवेशनको शुभकामना मन्तव्य व्यक्त गरेका थिए ।