काठमाडौं (हाम्रो खेलकुद)– जुम्ला एफसी मुगुमा जारी हेमराज भाम स्मृती कप फुटबल प्रतियोगिताको फाइनलमा पुगेको छ । ए वान एफसीलाई बिहीबार ५–१ ले हराउँदै जुम्ला एफसी उपाधि नजिक पुगेको हो ।

जुम्लाले शुक्रबार हुने फाइनलमा रेड पान्डा एफसीको सामना गर्नेछ । अघिल्लो दिन रारा लेक साइड क्लबलाई १–० ले हराउँदै रेड पान्डा फाइनलमा पुगेको थियो । जुम्ला एफसीलाई जित दिलाउन रुविन भण्डारीले ह्याट्रिक गरेको खेलमा चक्र लामा र प्रनिल देवकोटाले समान १ गोल गरे । ए वानका लागि भिमराज मल्लले गोल गरेको आयोजक भामवाडा फुटबल क्लबका सल्लाहकार राजेन्द्र मल्लले जानकारी दिए ।

जुम्लाका लागि रुविनले १९ औं मिनेटमा पहिलो गोल गरे । चक्रले ३८ औं मिनेटमा गोल गरे । रुविनले ४० औं अर्को गोल गर्दा सोही मिनेटमा प्रनिलले पनि गोल थपे । रुविनले ६० औं मिनेटमा अर्को गोल गर्दै ह्याट्रिक पूरा गरे । ए वानका लागि इन्जुरी समयको पाँचौ. मिनेटमा भिमराजले गोल गरेका थिए ।

प्रतियोगिताको विजेताले उपाधिसहित १ लाख रुपैयाँ प्राप्त गर्नेछन् । मुगुमा पहिलो पटक फुटबल प्रतियोगिता आयोजना भइरहेको बताइएको छ । स्वर्गिय हेमराज भामको सम्झनामा प्रतियोगिता आयोजना गरिएको हो । चैत २९ गते सुरु भएको प्रतियोगिता मुगु,जुम्ला, सुर्खेत, कास्की, चितवन र काठमाडौंका खेलाडीले सहभागी २८ टोलीबाट खेलिरहेका छन् ।

भामवाडा फुटबल क्ल्बका तत्कालीन कप्तान हेमराजको गत बर्ष पुस २८ गते निधन भएको थियो । मुगु जिल्लाको सफल खेलाडी गुमाउनुपरेकोले उनको सम्झनामा फुटबल प्रतियोगिताको आयोजना गरेको क्लबका अध्यक्ष गणेश सेजुवालले जानकारी दिए ।