काठमाडौं (हाम्रो खेलकुद)– काभा महिला भलिबल च्यालेन्ज कपमा नेपालले पहिलो खेल कीर्गिस्तानसँग खेल्ने भएको छ । जेठ ८ गते सुरु हुने च्याम्पियनसिपको पहिलो दिन हुने चार खेल मध्ये तेस्रो खेल नेपाल र कीर्गिस्तानबीच हुनेछ ।

यसअघि जेठ ६ देखि १५ गते सम्म हुने भनिएको च्यालेन्ज कप अब जेठ ८ देखि १४ गते सम्म हुने नेपाल भलिबल संघले जनाएको छ । त्रिपुरेश्वरस्थित राष्ट्रिय खेलकुद परिषद् (राखेप) मा हुने च्यालेन्ज कपमा पहिलो दिनको पहिलो खेल उज्वेकिस्तान र श्रीलंकाबीच हुनेछ । दोस्रो खेल बंगलादेश र भारतबीच हुनेछ । त्यस्तै अन्तिम खेल माल्दिभ्स र काजकिस्तानबीच खेल हुनेछ ।

सात दिने प्रतियोगिताको पहिलो तीन दिन ४ खेल र बाँकी ४ दिन दुई खेल हुनेछन् । नेपालले दोस्रो खेल जेठ ९ गते बंगलादेशसँग, तेस्रो खेल भारतसँग जेठ १० गते खेल्नेछ । समूह एमा नेपालसँगै भारत, बंगलादेश र कीर्गिस्तान रहेको छ । अर्को समूहमा उज्वेकिस्तान, श्रीलंका, माल्दिभ्स र काजकास्तान रहेका छन् ।

दुई समूहको राउन्ड रोविन लिगपछि शीर्ष २ टोली सेमिफाइनलमा र पुछारमा रहेका दुई टोलीले वरियताका लागि प्रतिस्पर्धा गर्नेछन् । च्यालेन्ज कपमा कुल २० खेल हुनेछ । च्यालेन्ज कपको प्रत्यक्ष प्रसारण हाम्रो खेलकुद डटकम र कान्तिपुर टेलिभिजनले गर्नेछन् ।