काठमाडौं (हाम्रो खेलकुद) – विभागीय टोलीद्धय त्रिभुवन आर्मी क्लब र नेपाल पुलिस क्लब प्रथम पोष्टबहादुर बोगटी स्मृति कप राष्ट्रिय पुरुष भलिबल प्रतियोगितामा सेमिफाइनलमा प्रवेश गरेका छन् ।

आर्मी समूह ‘ए’ विजेता तथा पुलिस समूह ‘बी’ को विजेता बन्दै अन्तिम चारमा पुग्न सफल भएको हो । त्रिपुरेश्वरस्थित राष्ट्रिय खेलकुद परिषद्को कभर्डहलमा बुधबार भएको समूह ‘ए’ को लिगको खेलमा आर्मीले गण्डकी प्रदेशमाथि २५–१०, २५–१७ र २७–२५ को सोझो सेटमा जित निकाल्दै समूह विजेता बन्यो ।

यस जितसँंगै आर्मी समूह विजेता बन्दा यो समूहमा दुई टोलीमात्र रहेकाले पराजित भएको गण्डकी पनि समूह उपविजेता बनेर सेमफाइनलमा पुगेको छ ।

पोष्टबहादुर बोगटी स्मृति प्रतिष्ठानद्वारा आयोजित प्रतियोगिताको अर्काे खेलमा पुलिसले सुदूरपश्चिम प्रदेशलाई २५–१६, २५–१७ र २५–१६ को सोझो सेटमा हराएर समूह विजेता बन्यो । पुलिसले पहिलो खेलमा एपिएफलाई ३–० कै सोझो सेटमा हराएको थियो । बिहीबार एपीएफ र सुदूरपश्चिमबीच हुने लिगको अन्तिम खेलबाट सेमिफाइनल पुग्ने अन्तिम टोलीको टुंगो लाग्ने छ ।

पाँच दिनसम्म लिगकम नकआउटको आधारमा सञ्चालन हुन प्रतियोगिताको विजेताले चार लाख, उपविजेताले दुई लाख, तेस्रो हुने टोलीले एक लाख रुपैयाँ र सन्त्वना पुरस्कार ५० हजार रुपियाँ पाउनेछ ।

विधागत उत्कृष्ट खेलाडी र प्रशिक्षकलाई जनही १० हजार र सर्वोत्कृष्ट खेलाडीले १५ हजार रुपियाँ प्रदान गरिने आयोजकले जनाएको छ । पोष्टबहादुर बोगटीको सम्झनामा आयोजित भलिबल प्रतियोगितामा तीन विभागीय, गण्डकी र सुदूरपश्चिम प्रदेशको सहभागिता रहेको छ ।