काठमाडौं (हाम्रो खेलकुद) – राष्ट्रिय भलिबल टोलीका मुख्य प्रशिक्षक बेल्जियन जान डे ब्रान्ट बुधबार काठमाडौं आइपुगेका छन् । डे ब्रान्टलाई नेपाल भलिबल संघका अध्यक्ष जीतेन्द्रबहादुर चन्द, महासचिव रोशन श्रेष्ठलगायतले त्रिभुवन अन्तर्राष्ट्रिय विमानस्थलमा स्वागत गरेका छन् ।

नेपाल भलिबल संघलाई प्राविधिक सहयोग गर्ने क्रममा अन्तर्राष्ट्रिय भलिबल महासंघले डे ब्रान्टलाई ६ महिनाका लागि नियुक्त गरेको संघले यसअघि नै जानकारी गराएसकेको छ । उनको पारिश्रमिक महासंघले तथा आन्तरिक खर्च भने संघले बेर्होने चन्दले बताए ।

संघको आयोजनामा २०८० जेठमा काभा महिला च्यालेन्ज कप भलिबल प्रतियोगिता आयोजना हुँदैछ । त्यसका नेपाली महिला टोलीको प्रशिक्षण सुरु भइसकेको छ । ६४ वर्षीय प्रशिक्षकले यसअघि युरोपमा विभिन्न क्लब टोलीको जिम्मेवारी सम्हालेका छन् । उनले पछिल्लो पटक सन् २०१८ मा टर्किस क्लब फेनेरबाचेको जिम्मेवारी सम्हालेका थिए ।

सन् २०१५ मा उनले हंगेरीलाई महिला युरोपेली भलिबल लिगको उपाधि दिलाएका थिए । त्यसबाहेक उनले टर्कीको घरेलु भलिबलमा पनि सफलता हासिल गरेका छन् । झन्डै २ दशक सक्रिय खेलाडीको रुपमा बिताएका ब्रान्ट त्यसयता भने प्रशिक्षणमा होमिएका थिए । उनले बेल्जियमको राष्ट्रिय महिला टोलीलाई पनि हेरेका थिए ।