सुर्खेत (हाम्रो खेलकुद)– नेपाल ओलम्पियन्स संघका अध्यक्ष दीपक विष्टसहितको खेलाडी टोलीले कर्णाली प्रदेशका मुख्यमन्त्री राजकुमार शर्मालाई बधाई तथा सफलताको शुभकामना दिएको छ ।

कर्णाली प्रदेशको जुम्ला र सुर्खेतमा स्कुल टु ओलम्पिक कार्यक्रम सञ्चालनका दौरान सुर्खेत आएका खेलाडीको टोलीले सोमबार मुख्यमन्त्री कार्यालयमा पुगेर शर्मालाई बधाई दिएको थियो । टोलीमा ओलम्पियन देवु थापा, कमल अधिकारी तथा १३ औं दक्षिण एसियाली खेलकुद (साग) का स्वर्ण पदक विजेता सुर्खेत निवासी दीपक हमाल सहभागी थिए ।

शर्माले संघलाई धन्यवाद दिदै खेलकुद विकासमा भविष्यमा सहकार्यका लागि आग्रह गरेका थिए । मुख्यमन्त्री शर्माले दुई वर्षपछि आयोजना हुने १० औं राष्ट्रिय खेलकुदलाइ प्रदेश सरकारले महत्वका साथ हेरेको र प्रदेश रंगशालालागयतका भौतिक पूर्वाधार निर्माणमा जोड दिएको बताए ।

संघका अध्यक्ष विष्टले प्रदेशको खेलकुद विकास र खेलाडी उत्पादनका लागि दक्ष प्रशिक्षक तयार पार्न मुख्यमन्त्रीलाई सुझाव दिए । उनीहरुले आवश्यकता परेको खण्डमा समय समय आफूहरु पनि प्रदेशको खेलाडीहरुलाई प्रशिक्षण दिन तयार रहेको समेत बताए ।

जुम्लामा कार्यरत राष्ट्रिय खेलकुद परिषद् (राखेप) का प्रशिक्षक हरि रोकायाले निरन्तर खेलाडी उत्पादन गर्दै देशको खेलकुदमा योगदान गरेको चर्चा गर्दै विष्टले भने,‘ उहाँ जस्तै अन्य प्रशिक्षक प्रदेश खेलकुद विकासका लागि आवश्यक छ । त्यसतर्फ पनि सरकारको ध्यान जाओस् । ’ प्रदेशले भौगोलिक अवस्था र श्रोतका आधारमा प्रदेशका लागि उपयुक्त हुने खेलको प्राथमिकता निर्धारण गरि सोही अनुरुप लगानी गर्न उनीहरुले सुझाव दिए ।

मुख्यमन्त्री शर्माले आफ्नो कार्यकालमा खेलकुद विकासका लागि जग बसाल्न प्रयास गर्ने वचन समेत दिए । सो अवसरमा कर्णाली खेलकुद विकास परिषद्का सदस्य सचिव विश्वमित्र सन्ज्यालको पनि उपस्थिति थियो ।