काठमाडौं (हाम्रो खेलकुद)– त्रिभुवन आर्मी क्लबले तेस्रो फिफ्टिन्स रग्बी क्लब लिगको उपाधि जितेको छ । दशरथ रंगशालामा शनिबार भएको राउन्ड रोविन लिगको अन्तिम खेलमा गोर्खाली रग्बी क्लबबीचको खेल १९–१९ स्कोरको बराबरीपछि समान १२ अंक भएपनि आर्मी स्कोर अन्तरको आधारमा विजयी भएको हो ।

अघिल्ला दुवै खेलमा आर्मी र गोर्खाली विजयी भएका थिए । शनिबारको बराबरीपछि आर्मीले ३ खेलमा २ जित र १ बराबरी सहित १२ अंक जोड्दा १ सय ६६ स्कोर गरेको थियो भने टोलीको विपक्षमा २९ स्कोर भएको थियो । त्यस्तै गोर्खालीले १२ अंक जोड्ने क्रममा १ सय ६२ स्कोर गर्दा ३९ स्कोर सामना गरेको थियो ।

त्यसअघि शनिबार नै हिमालयन रग्बी क्लबले आकाश भैरवलाई २२–१४ ले हराउँदै लिगमा तेस्रो स्थान प्राप्त गरेको थियो । हिमालयनले ३ खेलमा १ जित र २ हारसहित ४ अंक जोड्यो । आकाश भैरव भने लिगमा जित विहिन रह्यो ।

नेपाल रग्बी संघको आयोजना आइतबार सुरु भएको प्रतियोगिताका विजेता उपविजेता टोलीका खेलाडी पूर्व अर्थमन्त्री जनार्दन शर्मा, राष्ट्रिय खेलकुद परिषद्का सदस्य सचिव टंकलाल घिसिङ, नेपाल ओलम्पिक कमिटीका महासचिव निलेन्द्रराज श्रेष्ठलगायतले पुरस्कार वितरण गरेका थिए ।