काठमाडौं (हाम्रो खेलकुद) –तेस्रो फिफ्टिन्स रग्बी लिगको दोस्रो खेलमा त्रिभुवन आर्मी क्लब विजयी भएको छ । त्रिपुरेश्वरस्थित दशरथ रंगशालामा आइतबार सुरु भएको रग्बी लिगको दोस्रो खेलमा सन्जिव कुँवरको कप्तानीमा रहेको आर्मीले आकाश भैरवलाई ७२–० को अन्तरले हराएको थियो ।

त्यसअघि उद्घाटन खेलमा गोर्खाली रग्बी क्लबले हिमालयन टाइगर रग्बी क्लबलाई ६७–१७ ले हराएको थियो । नेपाल रग्बी संघको आयोजनामा सुरु भएको प्रतियोगिताको राष्ट्रिय खेलकुद परिषद् (राखेप) का सदस्य–सचिव टंकलाल घिसिङले रेफ्रीलाई रग्बी बल हस्तान्तरण गर्दै उद्घाटन गरे ।

रग्बी संघका अध्यक्ष दीपक देवकोटाको सभापतित्वमा भएको उद्घाटनमा नेपाल ओलम्पिक कमिटीका महासचिव निलेन्द्रराज श्रेष्ठ, राखेपका सदस्य अन्जन धमलालगायतको उपस्तिथि थियो । फिफ्टिन्स रग्बी लिगमा चार क्ल्बहरु आर्मी क्लब, आकश भैरव क्लब, गोर्खाली रग्बी क्लब, हिमालयन टाइगर रग्बी क्लब सहभागी छन् ।

दोश्रो चरणको खेल फागुन ३ गते हुनेछ । त्यस दिन आर्मी र हिमालय तथा आकाश भैरव र गोर्खालीबीच खेल हुनेछ । अन्तिम दिन फागुन ६ गते हिमालयन र आकाश भैरव तथा आर्मी र गोर्खालीबीच प्रतिस्पर्धा हुनेछ ।