काठमाडौं (हाम्रो खेलकुद)– शसस्त्र प्रहरी बलले खेल पोशाक सामाग्रीलगायत खेलकुद गतिविधिमा सहयोग पुर्याएकोमा तीन संस्थालाई कदर पत्रले सम्मान गरेको छ ।

२२ औं सशस्त्र प्रहरी दिवसका अवसरमा सोमबार आयोजित कार्यक्रममा कामारु ट्रेडिङ्ग प्रा.लि.(केल्मी नेपाल)का, प्रबन्ध निर्देशक उत्तम न्यौपाने, चौधरी ट्रेडर्सका सञ्चालक प्रमोद चौधरी र ब्ल्याक हर्ष सुज ईन्डष्ट्रिज प्रा.लि.का सञ्चालक चिन बहादुर श्रेष्ठलाई कदर पत्रले सम्मान गरेको छ । शसस्त्र प्रहरी बलका महानिरीक्षक राजु आर्यालले उनीहरुलाई कदर पत्रले सम्मान गरेका थिए । केल्मीले राष्ट्रिय भलिबल टोलीलाई प्रायोजन गर्दै आएको छ ।

३१ जनालाई आइजी एपिएफ कमेन्डेसन सम्मान

नेपाली खेलकुदमा सर्वाधिक सफल खेलाडी दीपक विष्टसहित प्रशिक्षक र खेलाडीलाई शसस्त्र प्रहरी बलले सोमबार सम्मान गरेको छ । २२औं सशस्त्र प्रहरी दिवस–२०७९को अवसरमा विभिन्न क्षेत्रमा संगठनलाई अनुकरणीय योगदान पु¥याएकोमा संस्थापक महानिरीक्षक स्व. कृष्णमोहन श्रेष्ठ, महानिरीक्षक स्व सहबीर थापा, विष्टसहित ३१ जनालाई पहिलो पटक आइजी एपिएफ कमेन्डेसनबाट सम्मान गरिएको जनाएको छ ।

१३ औं दक्षिण एसियाली खेलकुद (साग) का स्वर्ण पदक विजेता एथलेटिक्स गोपीचन्द्र पार्की, १३ औं साग बीच भलिबलकी कास्य पदक विजेता विनिता बुढाथोकी, नवौं राष्ट्रिय खेलकुदमा कीर्तिमानी खेलाडी रमिताकुमारी थारु, सलिम देवान र राएन गुरुङलाई आइजी एपिएफ कमेन्डेसन सम्मान प्राप्त गरे ।

प्रशिक्षकहरु कुस्तीका खगेन्द्रबहादुर बस्नेत, करातेका दीपक श्रेष्ठ, जिम्याष्टिकका राजेश्वरमान स्थापित, भारोत्तोलनका सञ्जय महर्जन र टेबल टेनिसका राजेन्द्रबहादुर दुलालले पनि आइजी एपिएफ कमेन्डेनस सम्मान प्राप्त गरे । खेलाडी र प्रशिक्षकलाई शसस्त्र प्रहरी महानिरक्षक राजु अर्यालले सम्मान गरेका थिए ।

ओलम्पियन तेक्वान्दो विष्टले सागका ४ संस्करणमा स्वर्ण पदक, एसियाली खेलकुदमा दुई कास्य पदक जितेका थिए । त्यस्तै विष्ट छनोट चरण पार गरेर ओलम्पिक खेल्ने दोस्रो नेपाली खेलाडी हुन् । तेक्वान्दोकै संगिना वैद्य छनोट भएर ओलम्पिक खेल्ने पहिलो नेपाली खेलाडी हुन् । शसस्त्र प्रहरी बल आफ्ना १६ खेलाडीलाई बढुवा पनि दिएको छ ।