काठमाडौं (हाम्रो खेलकुद)– थाइल्यान्डको बैंककमा जारी एएसबिसी यु–२२ बक्सिङ च्याम्पियनसिपको दोस्रो दिन बिहीबार नेपालका मुक्केबाज सुष्मा तामाङ र हेमा राईले जित हासिल गरेका छन् ।

महिला ४८ केजी तौलसमूहमा सुष्माले भियतनामकी क्यूनहानलाई ५–० अंकको आधारमा पराजित गरिन् । हेमाले ५७ केजी तौलसमूहमा सिगांपुरकी चौउजीमिन बेर्नेसलाई आरएसी आईको आधारमा दोस्रो राउण्डमा जित हासिल गरिन् । सुष्मा र हेमा आ आफ्नो तौल समूहको सेमिफाइनलमा पुगेको नेपाल बक्सिङ संघका प्रवक्ता श्याम अवालले जानकारी दिए ।

पुरुष ४८ केजीमा लालप्रसाद उप्रेतीले फिलिपिनी खेलाडी दुरेन्टमार्क लेफ्चर संग शुक्रबार क्वाटरफाइनलमा प्रतिस्पर्धा गर्नेछिन् । ५७ केजीमा नेपालका इन्द्रबहादुर सुनार अघिल्लो दिन क्वार्टरफाइनलमा प्रवेश गरेका थिए । लाओसका खेलाडीसंग ५–० अंकको आधारमा हराउँदै इन्द्र अन्तिम आठमा पुगेकी थिए ।

नेपालबाट सहभागी दुई खेलाडी विजय बाटा (८६ केजी) र महिला खेलाडी त्रिशा जवेगु (७५ केजी) ले आ आफ्नो तौल समूहको सेमिफाइनलमा स्थान बनाइसकेका छन् । विजयले इन्डोनेसियाका मोसकिता माईकल र त्रिशाले काजिकिस्तानका एरजन गुल्सायसंग खेल्ने छन् । नेपालले चार वटा तौल समूहमा कम्तीमा कास्य पदक पक्का गरिसकेको छ ।