काठमाडौं (हाम्रो खेलकुद)– राष्ट्रिय महिला भलिबल टोलीका दुई खेलाडी प्रतिभा माली र उषा भण्डारीले माल्दिभ्सको महिला भलिबल लिग खेल्ने भएका छन् । त्यसका लागि प्रतिभा मंगलबार साँझ त्यसतर्फ गएकी छन् भने उषा बुधबार दिउँसो जाँदैछिन् ।

दुई दिन अघि उषा सम्मलित नेपाल पुलिस क्लब र प्रतिभा सम्मलित न्यू डायमण्ड स्पोर्टस् क्लबले सातौं एनभिए क्लब च्याम्पियनसिपको फाइनलमा एकअर्काको सामना गरेका थिए । जसमा पुलिसले ३–२ ले बाजी मारेको थियो । च्याम्पियनसिपमा उषा सर्वोत्कृष्ट खेलाडी र प्रतिभा उत्कृष्ट स्पाइकर घोषित भएकी थिइन् ।

केहि साता अघि माल्दिभ्समै च्याम्पियसिप खेल्न गएकी उषाले यसपटक क्लब इगलबाट र प्रतिभाले वाम्कोबाट लिग खेल्ने तय भएको छ । उषाका अनुसार उनी र प्रतिभा सम्मलित लिगसहित क्लब भलिबल र पुलिसको टोलीले लिगमा प्रतिस्पर्धा गर्नेछ । लिग शनिबारदेखि माघ १३ गते सम्म हुनेछ । फाइनल माघ १६ गते हुनेछ ।

लिगलाई लिएर आफू उत्साहित रहेको उषाले बताइन् । देश बाहिर गएर पहिलो पटक लिग पहिलो पटक खेल्न लागेकी हु । त्यसैले उत्साहित छु, उनले भनिन् । प्रतिभा र उषा एभिसी सेन्ट्रल जोनको च्याम्पियन टोलीका सदस्य हुन् । प्रतिभा विना न्यू डायमण्ड र उषा विना पुलिसले माघ ८ देखि १४ गते सम्म पोखरामा आयोजना हुने तेस्रो टाइगर कप भलिबल च्याम्पियनसिपमा प्रतिस्पर्धा गर्नेछ ।