सफ्ट टेनिस : मध्यमाञ्चलका निर्मल र चन्द्रको जोडी पहिलो

बिराटनगर (हाम्रो खेलकुद) – सफ्ट टेनिसको अन्तिम दिन भएको एक मात्र स्पर्धाको मिक्स डबल्समा मध्यमाञ्चलका निर्मलकाजी स्थापित र चन्द्रमाया राईको जोडीले बुधबार स्वर्ण जितेका छन् ।

वैजनाथपुरमा भएको फाइनलमा उक्त जोडीले आफ्नै क्षेत्रका एलिजा रन्जित र प्रदीप खत्रीको जोडीलाई ५–३ को सेटमा पराजित गरे ।

पूर्वाञ्चलका जर्जिया चौधरी र दिपेन्द्र थापा मगर तथा मध्यमाञ्चलका कृपा शर्मा र धर्मराज घलेको जोडी संयुक्त रुपमा तेश्रो बने ।

प्रतियोगितामा पश्चिमाञ्चल बाहेक ४ क्षेत्रका समान २४ पुरुष र महिला गरी ४८ खेलाडीले विभिन्न ७ स्पर्धामा प्रतिस्पर्धा गरेका थिए ।

हिजो भएका फाइनल खेलहरुमा पुरुष डबल्समा मध्यमाञ्चलका प्रदीप खत्री र निर्मलकाजी स्थापितको जोडीले स्वर्ण जितेको थिए । उक्त जोडीले फाइनलमा पूर्वाञ्चलका आशिष बोहरा र युकेश योञ्जनको जोडीलाई ५–० को सोझो सेटमा पराजित गरेका थिए ।

पुरुष टिम स्पर्धामा पूर्वाञ्चल पहिलो, मध्यमाञ्चल दोश्रो तथा सुदूरपश्चिमाञ्चल र मध्यपश्चिमाञ्चल तेश्रो भएका थिए । सोही स्पर्धाको महिलामा मध्यमाञ्चल पहिलो, मध्यपश्चिमाञ्चल दोश्रो तथा पूर्वाञ्चल र सुदूरपश्चिमाञ्चल तेश्रो स्थानमा रहेका थिए ।