काठमाडौं (हाम्रो खेलकुद)– टाइगर ग्रुप अफ पोखरा नेपालको आयोजना हुने तेस्रो टाइगर कप राष्ट्रिय तथा अन्तर्राष्ट्रिय आमन्त्रित खुला क्लब च्याम्पियनसिप यसपटक विदेशी क्लबको सहभागिता रहने भएको छ ।

पोखरा रंगशालामा रहेको भलिबल कोर्टमा माघ ८ देखि १४ गते सम्म हुने प्रतियोगिता महिला र पुरुषतर्फ समान ५ टोलीको सहभागिता रहने सोमबार आयोजित पत्रकार सम्मेलनमा जानकारी दिइयो । महिला र पुरुष दुवैतर्फ समान १ विदेशी टोलीको सहभागिता रहने टाइगर ग्रुप अफ पोखराका अध्यक्ष नारायण प्रसाद शर्माले जानकारी दिए ।

महिलातर्फ भारतिय क्लब केरला स्टेट इलेक्ट्रोनिक बोर्ड तथा पुरुष तर्फ श्रीलंकाको एसटी जोशेफ वाज स्पोर्टस् क्लबको सहभागिता रहनेछ । त्यसबाहेक महिलातर्फ तीन विभागिय टोली त्रिभुवन आर्मी क्लब, नेपाल पुलिस क्लब, एपिएफ क्लब र न्यू डायमण्ड स्पोर्टस क्लबको सहभागिता रहनेछ ।

पुरुषतर्फ श्रीलंकाली टोलीसहित तीन विभागीय टोली र गण्डकी प्रदेशले प्रतिस्पर्धा गर्नेछन् । प्रतियोगितामा गत वर्षको विजेता महिलातर्फ एपिएफ र पुरुषतर्फ आर्मीले जितेको थियो । यसपटक पुरस्कार राशीमा दोब्बर बढाएको जनाएको छ ।

यसपटकको दुवैतर्फको विजेताले समान ५ लाख, दोस्रो टोलीले २ लाख ५० हजार, तेस्रो टोलीले १ लाख २५ हजार र चौथो टोलीले ६५ हजार रुपैयाँ प्राप्त गर्ने आयोजक संस्थाका उपाध्यक्ष एवंम् प्रतियोगिता संयोजक देवेन्द्र केसीले बताए । त्यस्तै महिला तथा पुरुषतर्फ सर्वोत्कृष्ट खेलाडीले समान २५ हजार तथा विधागत उतकृष्ट खेलाडी र प्रशिक्षकले समान १० हजार रुपैयाँ प्राप्त गर्नेछन् ।