सेन्ट्रल जोन बीच भलिबलको रजत विजेता दुवै टोली फर्कियो

काठमाडौं (हाम्रो खेलकुद)– एसियन सेन्ट्रल जोन सिनियर महिला र पुरुष बीच भलिबल च्याम्पियनसिपको रजत पदक विजेता दुवै नेपाली जोडी शनिबार स्वदेश फर्केको छ ।

नेपाल भलिबल संघका अध्यक्ष जितेन्द्रबहादुर चन्दसहित पदाधिकारीले त्रिभुवन अन्तर्राष्ट्रिय विमानस्थलमा खेलाडीको स्वागत गरेका थिए । महिलातर्फ कोपिला उप्रेती र कमला पुनको जोडी तथा पुरुषतर्फ मानबहादुर श्रेष्ठ र दिल सुनारको जोडीले बंगलादेशको कक्सबजारमा शुक्रबार सम्पन्न प्रतियोगितामा रजत पदक जितेको थियो ।

बिहीबार भएको महिलातर्फको फाइनलमा नेपाल पुलिस क्लबका कोपिला र कमलाको जाडी श्रीलंकाकी चथुरिका र दीपिकाको जोडीसँग २–० ले पराजित भएको थियो । शनिबार भएको पुरुषतर्फको फाइनलमा नेपाली सेनाका मानबहादुर र दिलको जोडी माल्दिभ्सका एडाम नासिम र स्लेमको जोडीसँग २–० ले नै पराजित भएको थियो ।

महिलातर्फ बंगलादेश र उज्वेकिस्तानको समान दुई टोली तथा नेपाल र श्रीलंकाको समान एक टोली गरी कुल ६ टोलीको सहभागिता रहेको थियो । पुरुषतर्फ आयोजक नेपालसहित माल्दिभ्स, आयोजक बंगलादेश, कीर्गिस्तान र भुटानको सहभागिता रहेको थियो । प्रतियोगितालाई एफआईभिबीले मान्यता दिएको थियो ।