काठमाडौं (हाम्रो खेलकुद)– नेपाल भेटेरिनरी एसोसिएसनले राइट टु प्रोटिन रन हाफ म्याराथनको दोस्रो संस्करण अर्को महिना आयोजना गर्ने भएको छ ।

राइट टु प्रोटिनको मर्मलाई आत्मसात गर्दै प्रोटिनजन्य पदार्थमा पहुँच बढाउन जनचेतना जगाउने उद्देश्यका साथ माघ ७ गते हाफ म्याराथन आयोजना गर्न लागिएको एसोसिएसनले बिहीबार आयोजना गरेको पत्रकार सम्मेलनमा अध्यक्ष सितलकाजी श्रेष्ठले जानकारी दिए ।

दशरथ रंगशालाबाट सुरु हुने हाफ म्याराथनसहितका विभिन्न विधामा झण्डै ३ हजारको सहभागिता रहने एसोसिएसनले आशा राखेको छ । गत वर्ष पहिलो संस्करण रन फर प्रोटिन हाफ म्याराथन भएको थियो । गत वर्षको हाफ म्याराथन महिलातर्फ १३ औं दक्षिण एसियाली खेलकुद (साग) की स्वर्ण पदक विजेता सन्तोषी श्रेष्ठ र पुरुषतर्फ तीर्थ पुन विजयी भएका थिए ।

यस पटक पनि खुल्ला महिला पुरुष हाफ म्याराथान, पुरुष १० किमी, महिला ५ किमी, १२ कक्षासम्मका विद्यार्थीलाई ५ किमि (पुरुष) र ३ कि मी (महिला) र फरक क्षमता भएका व्यक्तिहरुको लागि ह्विलचेयर दौड हुनेछ । विभिन्न विधामा गरि झण्डै १४ लाख रुपैयाँ पुरस्कार रहेको छ । हाफ म्याराथनका दुवैतर्फका विजेताले समान १ लाख रुपैयाँ प्राप्त गर्नेछन् । सबै विधामा दौड पूरा गर्नेका लागि पनि पदकको व्यवस्था गरिएको बताइएको छ ।

प्रतियोगितालाई नेपाल दाना उद्योग संघ र अन्तगर्तका दाना उद्योग सहयोगीको रुपमा रहेको बताइएको छ । प्रतियोगितामा नेपाल एथलेटिक्स संघको प्राविधिक सहयोग रहेको छ । प्रतियोगितामा प्रिमेरा हस्पिटल पार्टनर, इसेवा टिकेटिङ पार्टनर, आइएसएस साउन्ड सिस्टम पार्टनर तथा यूस र एसओवाई प्रबद्र्धकका रुपमा रहेका छन् ।

मेरियोट काठमाडौ र फेयरफिल्ड मेरियट हस्पिटालिटी पार्टनरका रुपमा रहेको बताइएको छ । सहभागीले ३ सय रुपैयाँ शुल्क तिरेर सहभागी हुने पर्नेछ । खेलाडीले अनलाइनमार्फत दर्ता गर्न सक्ने बताइएको छ ।