सूर्य नेपाल गल्फ क्लब टुर छनोटका विजेता विकास बोगटीसहित निश्चयजंग रायमाझी र शिवराम पौडेलले व्यवसायिक खेलाडीमा रुपान्तरण भएका छन् । तीन दिने छनोटमा २२ ओभरलाई व्यवसायिक खेलाडी छनोटको आधार बनाइएको थियो ।

नेपाल प्रोफेसनल गल्फर एसोसिएसन (नेपाल पिजिए) का सल्लाहकार धनश्याम थापाले व्यवसायिक खेलाडीलाई कार्ड वितरण गरे । व्यवसायिक खेलाडीमा रुपान्तर भएपनि निश्चयजंगले भने कार्ड‘होल्ड’ मा राख्न नेपाल पिजिएलाई आग्रह गरेका छन् । बिहीबार व्यवसायिक खेलाडीमा रुपान्तरण भएका विकास र शिवरामले सूर्य नेपाल गल्फ टुर २०१५÷१६ को टुर खेल्नेछन् ।

टुरको पहिलो प्रतियोगिता सूर्य नेपाल सेन्ट्रल ओपन सेप्टेम्बर २८ बाट गोकर्ण गल्फ क्लबमा सुरु हुँदैछ । रोयल नेपाल गल्फ क्लबमा बिहीबार सम्पन्न छनोटमा पार ६७ को प्रदर्शन गर्दै विकास विजेता बनेका हुन् । अन्तिम दिन बिहीबार विकासले २ ओभर ६९ को प्रदर्शन गरेका थिए । ५४ होलको प्रतिस्पर्धातमा समग्रमा ९ ओभर २ सय १० को कार्ड बनाउँदै विकास विजेता बनेका हुन् । निश्चयजंग दोस्रो र शिवराम तेस्रो भए । ८ ओभर ४७ को प्रदर्शन गरेका निश्चयजंगले समग्रतमा १३ ओभर २ सय १४ को कार्ड बनाए । शिवरामले अन्तिम दिन ७३ को प्रदर्शन गरे र छनोटमा कुल १९ ओभर २ सय २० को कार्ड बनाए ।

पाँच खेलाडीलाई व्यवसायिक खेलाडीको कार्ड दिने योजना नेपाल पिजिएको रहेपनि तीन खेलाडीमात्र सफल भएका छन् । मात्र १ स्ट्रोकका कारण दीनेश नगरकोटीले व्यवसायिक खेलाडीमा रुपान्तरण हुन अर्को बर्ष कुर्नु पर्ने भएको छ । अन्तिम दिन ६ ओभर ७३ को प्रदर्शन गरेका उनले समग्रतमा २३ ओभर २ सय २४ को कार्ड बनाए ।