बुद्धिचालमा रुपेश र सुजनालाई सुरुवाती सफलता

गोरखा (हाम्रो खेलकुद)– रुपेश जैसवाल र सुजना लोहनीले नवौ राष्ट्रिय खेलकुद प्रतियोगिता बुद्धिचाल प्रतियोगितामा विजयी सुरुवात गरेका छन् ।

गोरखा जिल्लामा सुरु भएको प्रतियोगिताको पहिलो चरणको खुला क्लासिकल इभेन्टमा विभागीय टोली त्रिभुवन आर्मी क्बलका रुपेशले गण्डकी प्रदेशका लेकबहादुर थापालाई पराजित गरेका हुन् । पहिलो चरणको महिला क्लासिकल इभेन्टमा आर्मीकै सुजनाले बागमतीकी मार्सल तामाङलाई पराजित गरिन् ।

खुला क्लासिकलतर्फको पहिलो चरणको खेलमा नेपाल प्रहरीका फिडे मास्टर शिक्षित भण्डारीले सशस्त्र प्रहरीबलका विश्वविजय घिमिरेलाई पराजित गरे । त्यस्तै आर्मीका क्यान्डिडेट मास्टर मिलन लामा र मधेस प्रदेशका मनोज बि.क बीच भएको प्रतियोगिता ‘ड्र’ भएको छ ।

खुला क्लासिकलतर्फ नै प्रदेश नम्बर १ का जेम्जुङ प्रसान्त दासलाई पूर्व राष्ट्रिय च्याम्पियनसमेत रहेका सुरवीर लामाले पराजित गरे । बागमतीका निकेन कुसताले आफ्नै प्रदेशका राजीव कार्कीलाई हराए । महिला क्लासिकलतर्फको पहिलो चरणको खेलमा बागमतिकी लक्ष्मी कँडेलले सशस्त्रकी गीता जैसवाललाई पराजित गरिन्। एनआरएनकी बिनिता कपालीले मधेसकी संगीता महतोलाई पराजित गरिन् । प्रतियोगितामा कुल ११ टिमको सहभागिता रहेको छ ।