काठमाडौं (हाम्रो खेलकुद) – नेपाल खेलकुद पत्रकार मञ्च (एनएसजेएफ) र कोरिया स्पोर्टस प्रेस युनियन (केएसपीयू ) बीच खेलकुद पत्रकारिताको विकास र खेलकुद पत्रकारहरुको क्षमता अभिबृद्धि गर्ने विषयमा सम्झौता भएको छ ।

इटलीको रोममा सम्पन्न अन्तर्राष्ट्रिय खेलकुद पत्रकार महासंघ एआइपीएसको विश्व सम्मेलनको अवसरमा मञ्च केएसपीयुबीच बुधबार सम्झौता भएको मञ्चले जनाएको छ । सम्झौतामा पत्रकार मञ्चका तर्फबाट अध्यक्ष दुर्गानाथ सुबेदी र केएसपीयुका तर्फबाट अध्यक्ष जोङ को याङ ले हस्ताक्षर गरेका थिए ।

सम्झौता अनुसार केएसपीयूले मञ्चले एनएसजेएफ एकेडेमी मार्फत गर्ने विभिन्न कार्यक्रम तथा सदस्यहरुको क्षमता अभिबृद्धि गर्न आयोजना गर्दै आएको प्रशिक्षण कार्यक्रममा आर्थिक तथा प्राविधिक सहयोग गर्नेछ । जस अन्तर्गत अनुसन्धान, प्रशिक्षण, छपाई तथा एक्सचेञ्ज प्रोगामहरु रहनेछन् ।

सहमति पत्रमा हस्ताक्षर गरेपछि मञ्चका अध्यक्ष सुवेदीले भने,’सम्झौता पछि मञ्चले आफ्नो सदस्यहरुको क्षमता अभिबृद्धिमा थप कार्यक्रम गर्न मद्दत मिल्नेछ । हामीले सदस्यहरुलाई कोरियामा पठाएर समेत एक्सचेञ्ज प्रोगाम अन्तर्गत विशेष फाइदा मिल्न सक्ने विश्वास लिएका छौं।’

केएसपीयुका अध्यक्ष जोङले भने , ‘मञ्चका गतिविधिबाट हामी पहिलेदेखि नै प्रभावित भएको हुनाले त्यस्ता कार्यक्रमलाई थप सहयोग पुगोस् भन्ने उदेश्यले हामीले यो सम्झौता गर्न मञ्चलाई नै रोजेका हौं।’