तनहुँ (हाम्रो खेलकुद) – तनहुँको व्यास युवा क्लबको आयोजनामा व्यास युवा कप २०७९ फुटबल प्रतियोगिता सोमबार सुरु भएको छ ।

व्यास नगरपालिका–४ को व्यवास युवा क्लबले दमौलीको बीपी वन बाटिकाको मैदानमा प्रतियोगिता आयोजना गरेको हो । प्रतियोगिताको उद्घाटन खेलमा भुयङ्गा युथ क्लब टाइब्रेकरमा विजयी भएको छ । भुयङ्गा र बाराही कलेजबीचको खेलको १–१ को बराबरीपछि टाइब्रेकरमा भुयङ्गा क्लब ४–३ गोल विजयी भएको थियो । पहिलो दिनको अर्को खेलमा खेलमा पाटन युथ क्लबले मुनसाइन एफसीलाई ४–० ले हराएको थियो ।

अखिल नेपाल फुटबल संघ एन्फाको प्राविधिक सहयोगमा जारी प्रतियोगिताको विजेताले १ लाख ११ हजार १ सय ११ रुपैयाँ तथा दोस्रो हुने टोलीले ५५ हजार ५ सय ५५ रुपैयाँमा प्राप्त गर्नेछ । प्रतियोगितामा उत्कृष्ट खेलाडी, उत्कृष्ट गोल किपर र सर्वाधिक गोल कर्ताले समान ५ हजार रुपैयाँ पुरस्कार प्राप्त गर्नेछन् । युवाहरुलाई फुटबल खेलतर्फ आकर्षण गर्ने र राष्ट्रिय एवं अन्तर्राष्ट्रिय फुटबल खेलाडी उत्पादन गर्ने उद्देश्यले उक्त प्रतियोगिताको आयोजना गरिएको क्लबका अध्यक्ष मिनबहादुर गुरुङले बताए ।

१३ लाख रुपियाँ खर्च हुने अनुमान गरिएको प्रतियोगितालाई व्यास नगरपालिका, स्थानीय सहयोगी संस्था र विदेशमा भएका क्लबका शुभचिन्तकले सहयोग गरेका छन् । नेपालीहरुको महान पर्व विजयादशमी, शुभदिपावली र छठ पर्वको अवसरमा उक्त फुटबल प्रतियोगिताको आयोजना गरिएको हो । प्रतियोगिताको व्यास नगरपालिकाको मेयर बैकुण्ठ न्यौपानेले उद्घाटन गरेका थिए ।