पोखरा (हाम्रो खेलकुद) – विभागीय भिडन्तमा त्रिभुवन आर्मी क्लबलाई पराजित गर्दै साविक विजेता नेपाल पुलिस क्लब लामाचौर तीज महोत्सव–२०७९ अन्तर्गत लामाचौर कप महिला तथा पुरुष राष्ट्रिय भलिबल प्रतियोगिता अन्तरगत महिलातर्फ फाइनलमा प्रवेश गरेको छ ।

लामाचौरस्थित इन्द्र राज्यलक्ष्मी माविको भलिबल कोर्टमा मंगलबार भएको खेलमा पहिलो सेमिफाइनलमा सुरुवाती सेट गुमाएको पुलिसले त्यसपछिको तीनै सेट आफ्नो पक्षमा पार्दै आर्मीलाई ३–१ को सेटमा पराजित गर्दै फाइनलमा पुगेको हो ।

प्रतिस्पर्धात्मक र रोमाञ्चक बनेको खेलको पहिलो सेट पुलिसले २६–२८ ले गुमाएको थियो । दोस्रो सेट पनि प्रतिस्पर्धात्मक बन्दा पुलिस २७–२५ ले विजयी हुन सफल भयो । तेस्रो सेटमा एकपक्षीय खेल पस्केको पुलिसले २५–११ ले जित निकाल्न सफल भयो ।

चौथो सेटमा १८–२२ ले पछि रहेको पुलिसले पूनरागमन गर्दै २६–२४ को जित निकाल्दै फाइनलमा पुग्न सफल भयो । अब पुलिसले उपाधिका लागि बुधबार न्यू डायमन्ड युथ स्पोर्ट्स क्लब र गण्डकी प्रदेशबीचको विजेतासँग खेल्नेछ । न्यु डायमन्ड र गण्डकीबीच केही वेरमा दोस्रो सेमिफाइनल खेल हुँदैछ ।

पुरुषतर्फ सेमिफाइनलमा मंगलबारै गण्डकी र एपिएफ तथा पुलिस र आर्मीबीच प्रतिस्पर्धा हुनेछ । फाइनल बुधबार हुनेछ ।
नव आदर्श सामुदायिक विकास समाजको आयोजनामा भइरहेको प्रतियोगितामा महिलातर्फ चार र पुरुषतर्फ पाँच टिमको सहभागिता रहेको छ । महिलातर्फ एपिएफ अन्तिम समयमा सहभागी भएनन् ।

महिलातर्फ नेपाल प्रहरी, त्रिभुवन आर्मी क्लब, न्यू डायमण्ड युथ स्पोर्टस् क्लब र गण्डकी प्रदेशको टिमले भाग लिएका छन् । पुरुषतर्फ नेपाल प्रहरी, सशस्त्र प्रहरी बल, त्रिभुवन आर्मी क्लबसहित बुटवलको मणिमुकुन्द भलिबल क्लब र गण्डकी प्रदेशको टिम गरी ५ टिमको सहभागिता रहेको छ ।

दुवै विधातर्फको विजेताले समान १ लाख ५० हजार १ सय ११, उपविजेताले १ लाख १ सय ११ र तेस्रो हुनेले ५० हजार १ सय ११ रुपैयाँ प्राप्त गर्नेछ । सर्वोत्कृष्ट खेलाडीसहित विधागतरुपमा उत्कृष्टले पनि पुरस्कार प्राप्त गर्नेछ ।