काठमाडौं (हाम्रो खेलकुद) – नेपाल ओलम्पिक कमिटी (एनओसी) ले ‘बाई–अप होल्डिङ कम्पनी’ सँग चीनमा अर्काे वर्ष आयोजना हुने १९औं एसियाली खेलकुदमा सहभागी हुने नेपाली टोलीका लागि खेल पोशाक प्रायोजन सम्झौता गरेको छ ।

चीनको हाङझााउमा सन् २०२३ को सेप्टेम्बर २३ देखि अक्टोबर ८ सम्म आयोजना हुँदैछ । सम्झौतामा एनओसीका महासचिव निलेन्द्र राज श्रेष्ठ र हङकङ–चीनको बाई–अपका सिओओ स्टेवार्ड छ्यङ्गले हस्ताक्षर गरे ।

एनओसीका अनुसार बाई–अपले एसियाली खेलकुदमा सहभागी हुने टोलीका सम्पूर्ण सदस्यलाई खेल पोशाक प्रदान गर्नेछ । खेल पोशाकमा ट्रयाकसुट, टि–सर्ट, पोलो टी–सर्ट, स्पोर्ट्स सुज, सट्स, मोजा, टोपी, झोला र रुमाल छन् । सम्झौता अनुसार एसियाली खेलकुद सुरु हुनु अगाडि नै कम्पनीले ४ सय ५० थान खेल पोशक हस्तान्तर गर्नेछ ।

सोही कम्पनीले सन् २०१८ मा इन्डोनेसियामा भएको एसियाली खेलकुदमा पनि टोलीलाई खेल पोशाक प्रायोजन गरेको थियो । महासचिव श्रेष्ठले प्रतियोगितामा सहभागी हुने नेपाली टोलीलको एकै ढाँचाको डिजाइन हुने बताए । उनले बाई–अप कम्पनीसँगको सम्झौता आउने वर्षमा पनि कायम हुने विश्वास राखे । बाई–अपका सिओओ छ्यङ्गले एसियाली खेलकुदमा नेपाली खेलाडीको उत्कृष्ट प्रदर्शन हुने विश्वास व्यक्त गरे ।