एन्फा प्रवक्ता शाहले जिम्मेवारी सम्हाले

काठमाडौं (हाम्रो खेलकुद) – अखिल नेपाल फुटबल संघ (एन्फा) का नव नियुक्त प्रवक्ता सुरेश शाहले आइतबारबाट आफ्नो जिम्मेवारी सम्हालेका छन् । एन्फा महासचिव किरण राईले उनलाई सातदोबाटोस्थित एन्फा मुख्यालयमा प्रवक्ताको जिम्मेवारीको पत्र हस्तान्तरण गरेका थिए ।

एन्फाका पूर्व मानार्थ केन्द्रिय सदस्य समेत रहेका शाहलाई साउन १६ गतेको एन्फा कार्यसमितिको दोस्रो बैठकले प्रवक्ता नियुक्त गरेको थियो । पहिलो पटक एन्फाको औपचारिक जिम्मेवारीलाई आफूले अवसर र चुनौती दुवै रुपमा लिएको शाहले बताए ।

‘मैले केन्द्रमा यो किसिमको जिम्मेवारी पहिलो पटक पाएको छु,’ उनले भने,‘ यो मेरो लागि अवसर हो भने सँगै चुनौती पनि हो । इमान्दारपूर्वक जिम्मेवारी निर्वाहको प्रयास गर्नेछु । ’ यसअघि उनी प्रदेश फुटबल संघको उपाध्यक्षका रुपमा काम गरेका थिए ।

२०५४ मा पाँचथर जिल्ला फुटबल संघको संस्थापक अध्यक्ष रहेको शाहले अहिलेको साझा उद्देश्य फुटबललाई अघि बढाउनु रहेको उल्लेख गर्दै भने,‘ फुटबल विकासमा सबैको सहयोग जरुरी हुन्छ । अहिले एन्फाको आधिकारी धारणा जनमानसमा पु¥याउने जिम्मेवारी पाएको छु । एन्फाको अधिकारिक तथा सहि सुचना र सहि समयमा उपलब्ध गराउने मेरो प्रयास हुनेछ ।’