काठमाडौं (हाम्रो खेलकुद) –नेपाल विश्वको सर्वोच्च शिखर भएको देशसँगै सबैभन्दा उचाईमा गल्फ कोर्ष भएको देशको नाममा चिनिने भएको छ ।

मुस्ताङ जिल्लाको लोमान्थाङमा मुस्ताङ गल्फ कोषको निर्माण सम्पन्न भएको सोमबार आयोजित पत्रकार सम्मेलनमा जानकारी दियो । मुस्ताङ गल्फ कोर्ष समुद्री सतहबाट ४ हजार ६ सय ४५ मिटरको उचाईमा रहेको बताइएको छ । भारतको सिक्किममा रहेको याक गल्फ कोर्ष यसअघि सर्वाधिक हाइ अल्टिच्युटमा रहेको गल्फ कोर्षका रुपमा परिचित थियो । याक गल्फ कोर्ष समुन्द्री सतहबाट ३ हजार ९ सय ७० मिटरको उचाईमा रहेको छ ।

गल्फ‌ कोर्ष गण्डकी प्रदेश सांसद इन्द्रधारा विष्टको अगुवाईमा निर्माण भएको हो । सांसद विकास कोष र लोमान्थाङ गाउँपालिकाको सहयोगमा गल्फ कोर्ष निर्माण भएको बताइएको छ । प्रदेश सांसद विष्टको उपस्थितिमा भएको पत्रकार सम्मेलनमा कोर्ष ९ होलको रहेको जानकारी गराइयो ।

सोहि कोर्षमा पहिलो प्रतियोगिताको रुपमा अर्को महिना टप अफ द वल्र्ड गल्फ च्यालेन्ज आयोजना हुने भएको छ । भदौ ११ गते आयोजना हुने गल्फ च्यालेन्जमा काठमाडौं र पोखराका गरि ४ महिलासहित २८ गल्फरको सहभागिता रहेनछ । आउने दिनमा उक्त कोर्षमा प्रतियोगिता आयोजना हुँदा विदेशी खेलाडीको सहमागिता रहने विश्वास गरिएको छ ।

टप अफ द वल्र्ड गल्फ च्यालेन्जस स्टेबल फम्र्याट ३/४ ह्याण्डीक्यापका आधारमा हुने नेपाल प्रोफेसनल गल्फर एसोसिएसनका महासचिव दीपक आचार्यले जानकारी दिए । प्रतियोगिताका विजेता, उपविजेता, महिला विजेता, बेस्ट ग्रस, क्लोजेस्ट टु द पिन, लंगेस्ट ड्राइभ र मस्ट बर्डिज गर्ने खेलाडीलाई पुरस्कृत गरिने बताइएको छ ।