काठमाडौं (हाम्रो खेलकुद) – नेदरल्यान्ड्सको हल्याण्ड फुटबल युनिभर्सिटीको आयोजनामा हुने फुटबल प्रशिक्षण र प्रशिक्षक प्रशिक्षण क्याम्पमा सहभागी हुन स्वस्तीश्री गुरुकुलको टोली त्यसतर्फ जाने भएको छ ।

स्वस्तीश्री गुरुकुलका फुटबल दुतका रुपमा रहेका राष्ट्रिय फुटबल टोलीका पूर्व कप्तान अनिल गुरुङको नेतृत्वमा सहभागी हुने टोलीको खेलाडीमा दिर्घायु पिया, सदित अर्याल, दीप खत्री, बैभव ताम्राकार, कृतज्ञ कोजु, निशान कुँवर, साश्वत बुढाथोकी, सर्वणी सुवेदी, प्रश्रय श्रेष्ठ, पाल्देन दोर्जे शेर्पा, ज्युड सापकोटा छन् ।

त्यस्तै भाईचुङ्ग तामाङ्ग, कविर आचार्य, प्रणव धाख्वा, रायन गुरुङ्ग, शुभाना मानन्धर, कर्मा लेन्दुप शेर्पा, स्पर्श पन्थ, सौरव बरुवाल, जास्मिन सापकोटा र रिहान मान जोशी टोलीका खेलाडी हुन् । टोलीको प्रशिक्षकमा ज्वाला बिष्ट छन् । प्रशिक्षण कार्यक्रम साउन २५ देखि ३१ गते सम्म संचालन हुने बताइएको छ ।

टोलीलाई राष्ट्रिय खेलकुद परिषद् (राखेप) का उपाध्यक्ष शिव कोईराला ज्वाला, अखिल नेपाल फुटबल संघ (एन्फा) का उपाध्यक्ष दावा लामाले शुभकामना दिदै विदाई गरे । राखेप उपाध्यक्ष कोइरालाले त्यहाँ प्राप्त ज्ञान नेपाली फुटबलमा उपयोगी हुने विश्वास व्यक्त गर्दै टोलीले देशको प्रतिनिधित्व पनि मुलुकको इज्जत बढाउन आग्रह गरे । उनले खेलकुदको उद्गम थलो स्कुलनै भएको भन्दै खेलाडी तयार गर्न स्वस्तीश्रीले गरेको कामको प्रशंसा गरे ।

एन्फाका उपाध्यक्ष लामाले स्कुलको मात्र नभई नेपाल र एन्फाको समेत प्रतिनिधित्व गर्ने भएकोले शुभकामना दिदै त्यसले नेपाली फुटबललाई फाइदा हुने विश्वास व्यक्त गरे । खेलाडीहरु आफ्नो खर्चमा त्यस तर्फ जान लागेको र व्यक्तिगत सम्बन्धका कारण प्रशिक्षण कार्यक्रममा सहभागी हुने भएकाले छनोट नगरिएको पूर्व कप्तान गुरुङले जानकारी दिए । टोली सोमबार त्यस तर्फ जानेछ ।