काठमाडौं (हाम्रो खेलकुद)– शारिरीक सुगठन खेलाडी राजु राईले मालदिभ्समा आयोजना भईरहेको ५४ औं एशियन शारिरीक सुगठन तथा फिजिक स्पोर्टस् अन्तरगत फिटनेश फिजिकमा कास्य पदक जितेका छन् ।

टोलीका ब्यवस्थापक संघका उपाध्यक्ष दिनेश राजभण्डारीका अनुसार राजुले १७० से.मि. सम्मको समूहमा तेश्रो स्थान प्राप्त गरेको राष्ट्रिय खेलकुद परिषद् (राखेप) ले जनाएको छ । २४ राष्ट्र सहभागि सो विधामा राजुले स्पाईडर म्यान प्रदर्शन तथा फिजिक तर्फ पदक जितेका हुन् । यस अघि पनि नेपाली खेलाडीहरुले एशियन शारिरीक सुगठनमा पदक प्राप्त गरिसकेका छन् ।

यस्तै सोहि प्रतियोगिताका दौरान शारिरीक सुगठन खेलको विकासमा ठोस योगदान पु¥याए बापत विश्व शारिरीक सुगठन तथा फिजिकल फिटनेश महासंघले नेपाल शारिरीक सुगठन तथा फिजिकल फिटनेशका अध्यक्ष राजेश बाबु श्रेष्ठलाई विशिष्ट अवार्डबाट सम्मान गरिएको छ ।

प्रतियोगतामा राजु सहित सुजिता मानन्धर र उमेश राई पनि प्रतिस्पर्धा गर्नेछन् ।सुजिताले सोमबार आफ्नो फिजिक अन्तरगतको विधमा र उमेशले बुधबार प्रतिस्पर्धा गर्दैछन् ।

प्रतियोगितामा नेपालका तर्फबाट निर्णायकको भूमिका निर्वाह गर्न अन्तराष्ट्रिय निर्णायक एवं संघका बरिष्ठ उपाध्यक्ष विजय लाल कायस्थ, नानी काजी डङ्गोल र लक्ष्मण महत पनि मालदिभ्समा पुगेका छन् । नेपालले सन् २०२३ मा ५५ औं एशियन शारिरीक सुगठन तथा फिजिक स्पोर्टस् आयोजना गर्ने भएको छ ।