एसियली खेलकुद छनोट-बक्सिङको दोस्रो चरणमा चन्द्रको जित

काठमाडौं (हाम्रो खेलकुद) – एसियाली खेलकुदका लागि बक्सिङको दोस्रो चरणको छनोटमा पुरुष ५२ केजी तौल समूहमा नेपाल प्रहरीका चन्द्र थापा विजयी भएका छन् । चन्द्रले मंगलबार भएको फाइनलमा बक्समाण्डुका लक्ष्मण राईलाई ५–० ले हराएका छन् ।

५२ केजीकै महिलातर्फ नक्साल बक्सिङ क्लबकी सुष्मा तामाङ विजयी भइन् । सुष्माले त्रिभुवन आर्मी क्लबकी मिनु गुरुङलाई ३–२ को स्पिलिट डिसिजनका आधारमा पराजित गरेकी थिइन् । महिला वैन्टम वैट ५७ किलो तौल समुहमा टिएसी वी का चन्द्रकला थापाले विजयी भइन् । उनले प्रहरीकी निशा तामाङलाई ५–० अंकको आधारमा पराजित गरेकी हुन् ।

महिला ६० किलो तौल समूहमा आर्मीकी पूनम रावलले फाइनलमा एपीएफका सगिता सुनारलाई स्पिलिट डिसिजनका आधारमा पराजित गरिन् । महिला ६९ केजी तौल समूहको फाइनलमा एपिएफकी सरस्वती रानामगरले विनिता थापामगरलाई एबिडीको आधारमा हराइन् ।

पुरुष ५७ किलो तौलमा बक्समाण्डुका सुरज महर्जन विजयी भए । सुरजले एपिएफका पुरन राईलाई स्पिलिट डिसिजनका आधारमा पराजित गरे । ६३ केजी तौलमा पुलिसका भुपेन्द्र थापामगरले एपिएफका सोनम सार्कीलाई ५–० अंकको आधारमा पराजित गरे । ७५ केजी तौल समूहमा आर्मीका दीपेश लामा विजयी भए । दिपेशले काठमाण्डौका सनिल शाहीलाई स्पिलिट डिसिजनका आधारमा पराजित गरे ।