काठमाडौं (हाम्रो खेलकुद) – नेपाली महिला राष्ट्रिय भलिबल टोलीकी सदस्य कामना बिष्टसम्मिलित पुलिस क्लब माल्दिभ्समा जारी माल्दिभ्स भलिबल एसोसिएसन कप २०२२ को फाइनलमा प्रवेश गरेको छ ।

माल्दिभ्सको मालेस्थित सोसल सेन्टर इन्डोर हलमा मंगलबार राति भएको तेस्रो सेमिफाइनलमा क्लब इगललाई ३–१ को सेटमा पराजित गर्दै पुलिसले फाइनलमा स्थान पक्का गरेको हो ।

पहिलो सेट २५–१७ ले सहजै आफ्नो पक्षमा पारेको पुलिसले दोस्रो सेट १७–२५ ले गुमाउन पुगेको थियो । तेस्रो सेटमा २५–२० को जित निकाल्दै पुलिस जिततर्फ अघि बढ्यो । प्रतिस्पर्धात्मक रोमाञ्चक बनेको चौथो सेटमा पुलिसले १९–१९ को बराबरीबाट अघि बढ्दै २५–२० को जित निकाल्दै फाइनलमा स्थान बनाउन सफल भयो ।

अब पुलिसले उपाधिका लागि क्लब वाम्कोसँग प्रतिस्पर्धा गर्नेछ । क्लब वान्कोले यसअघि पहिलो सेमिफाइनलमा पुलिसलाई ३–२ को सेटमा पराजित गर्दै फाइनलमा स्थान पक्का गरिसकेको छ ।

नेपाली राष्ट्रिय टोलीकी अर्की सदस्य उषा भण्डारी सम्मिलित दिबेही सिफान्जी क्लब भने चार खेलमा तेस्रो हार बेहोर्दै समूह चरणबाटै बाहिरिसकेको छ । कामना र उषाले घरेलु भलिबलमा विभागीय नेपाल पुलिस क्लबबाट व्यवसायिक खेल खेल्ने गर्छन् । कामना र उषाको यो पहिलोपटक विदेशी लिग खेल हो । लिगमा १० टोलीको सहभागिता रहेको छ ।

यसअघि नेपालबाट माल्दिभ्सको उक्त लिगमा राष्ट्रिय टोलीकी पुर्व उपकप्तान मन्जु गुरुङ, कोपिला उप्रेती, निमा श्रेष्ठ, राष्ट्रिय टोलीकी सदस्य प्रतिभा माली, सरस्वती चौधरी र अरुणा शाहीले खेलिसकेकी छिन् ।