काठमाडौं (हाम्रो खेलकुद) – अर्को महिना गण्डकी प्रदेशको पोखरामा आयोजना हुने नवौं राष्ट्रिय खेलकुदमा ३६ खेल समावेश गरिने भएको छ । युवा तथा खेलकुद मन्त्री तथा राष्ट्रिय खेलकुद परिषद् (राखेप) का अध्यक्ष महेश्वर गहतराजको अध्यक्ष्तामा शुक्रबार बासेको बोर्ड बैठकले खेल संख्या तय गरेको हो ।

राष्ट्रिय खेलकुदको नवौं संस्करण जेठ २२ देखि २८ गते सम्म आयोजना हुने यसअघि नै घोषणा भइसकेको छ । राष्ट्रिय खेलकुद विकास ऐन २०७७ कार्यान्वयनपछि पहिलो पटक बासेको राखेपको बोर्ड बैठकले नवौं राष्ट्रिय खेलकुद प्रतियोगिता संचालन निर्देशिका–२०७९ पारिस गरेको बताइएको छ ।
नवौं राष्ट्रिय खेलकुदमा एथलेटिक्स, ब्याडमिन्टन, टेबल–टेनिस, क्रिकेट, फुटबल, टेनिस, हक्की, बक्सिङ, भलिवल, कबड्डी, भारत्तोलन, सुटिङ, जिम्नास्टीक, पौडी, ह्याण्डबल, जुडो, कुस्ती, सफ्ट टेनिस, स्क्वास समावेश छन् ।

त्यस्तै तेक्वान्दो, उसु, बास्केटबल, शारिरीक सुगठन, बुद्धिचाल, खो–खो, कराँते, फुल कन्ट्याक्ट कराँते, आईटिएफ टेक्वान्दो, सेपाक्टाक्रो, गल्फ, आचरी, साईक्लिङ, फेन्सीङ, ट्राईथेलेन, प्याराग्लाईपिडङ र रग्बी ७ ए साईट खेल नवौंमा राखिएका छन् । बैठकले ठेलो र क्यानोइङलाई प्रदर्शनी खेलको रुपमा प्रतियोगितामा समावेश गर्ने निर्णय समेत भएको छ ।

बैठकले नवौं राष्ट्रिय खेलकुद प्रतियोगिताकालागि आवश्यक लोगो, मस्कट र नारा तय गर्नका लागि आवश्यक प्रक्रिया अगाडी बढाउनुका साथै प्रतियोगिता मुल आयोजक कमिटि, कार्यकारी समिति, उप–समिति तथा सचिवालय गठन गर्ने निर्णय समेत गरेको जनाएको छ ।

११ टोलीको सहभागिता

नवौं राष्ट्रिय खेलकुदमा ११ टोलीको सहभागिता रहने भएको छ । ७ प्रदेश, तीन विभाग (सेना, प्रहरी र सशस्त्र प्रहरी) र एनआरएनए गरि ११ टोलीले प्रतिस्पर्धा गर्नेछन् ।