काठमाडौं (हाम्रो खेलकुद)– डेभिड प्रथम हेरिटेज रिङ रेस्लिङ (आरडब्लू) राष्ट्रिय च्याम्पियनसिप अन्तरगतको हेभी वेटतर्फ च्याम्पियन बनेका छन् । काठमाडौंको बसन्तपुर डबलीमा शनिबार भएको हेभीवेट भिडन्तमा डेभिडले नुवाकोटे टाइगरलाई पराजित गरेका हुन् ।

डेभिडले हेभी वेट बेल्टसँगै १ लाख ५ हजार रुपैया, मेडल र प्रमाणपत्र हात पारे । मिडल वेट च्याम्पियन बनेका नुवाकोटे टाइगरले ८५ हजार रुपैयाँ प्राप्त गरे । यो विधामा अघिल्लो पटकको च्याम्पियन चट्टान तेस्रो भए । तेस्रो स्थानको लागि हुने प्रतिस्पर्धामा साइन घाइते भएर खेल्न नसक्ने भएपछि रेफ्रीले उनलाई चट्टानलाई विजेता घोषणा गरेका थिए । हाडकोर च्याम्पियन चट्टानले ७५ हजार रुपैयाँ पाए ।

नुवाकोटे टाइगरले चट्टानलाई तथा डेभिडले साइनलाई पराजित गर्दै फाइनलको भिडन्त तय गरेका थिए । ट्याग टिममा योङ स्याडी र सिजे वल्डको जोडीले स्पाइडर म्यानलाई पराजित गर्दै च्याम्पियन बने । ट्याग टिम च्याम्पियन जोडीले ९५ हजार रुपैया हात पार्यो । निकै नै रोमाञ्चक बनेको लाईट वेट फिमेलमा तन्नुलाई पराजित गर्दै आकृति च्याम्पियन बनिन् । च्याम्पियन आकृतिले ६५ हजार रुपैयाँ हात पारिन् ।

च्याम्पियन खेलाडीलाई राष्ट्रिय खेलकुद परिषद (राखेप) पुर्व उपाध्यक्ष पिताम्वर तिम्सिना, मदन भण्डारी स्पोर्ट्स एकेडेमीका महासचिव पुरेन्द्र विक्रम लाखे, राखेप सदस्य एकेन्द्र कुँवर, चन्द्र बदना राई, रिङ रेस्लिङ संघका महासचिव सुवर्ण श्रेष्ठ लगायतले पुरस्कृत गरे । नेपाल रिङ रेस्लिङको आयोजना तथा काठमाडौं महानगरपालिका र टोखा नगरपालिकाको सहयोगमा च्याम्पियनसिप आयोजना भएको थियो ।