धाविका पुष्पालाई स्पेसल अवार्ड

काठमाडौं (हाम्रो खेलकुद)– धाविका पुष्पा भण्डारी पल्सर स्पोर्टस अवार्डमा स्पेसल अवार्डबाट सम्मानित भएकी छिन् । नेपाल खेलकुद पत्रकार मञ्चको आयोजनामा मंगलबार भएको १८ औं संस्करणमा पुष्पा स्पेशल अवार्ड पर्फमर अफ दि इयरबाट सम्मानित भएकी हुन् ।

कोरोना संक्रमणका कारण लगभग ढप्प भएको खेलमा पुष्पाको सफलताले केहि राहत दिएको थियो। २०७७ मा नेपालले अन्तर्राष्ट्रिय खेलकुदमा व्यक्तिगत तर्फ पुष्पाले दिलाएकै सफलता एक मात्र रह्यो। गतवर्ष पुष २६ गते बंगलादेशको ढाकामा सम्पन्न बंगबन्धु शेख मुजिव ढाका म्याराथनमा उनले स्वर्ण पदक जितेकी थिइन् ।

त्यसमा उनले दुई भारतीय खेलाडीलाई पछि पार्दै आफूलाई विजेता बनाएकी थिइन् । उनले २ घण्टा ५९ मिनेट ४१ सेकेन्डमा उक्त दौड पूरा गरेकी थिइन् । दुई वर्षअघि स्वदेशमा भएको १३ औं दक्षिण एसियाली खेलकुद (साग) मा पुष्पाले रजत पदक जितेकी थिइन् ।

धनगढीमा २०६८ मा भएको छेटौं राष्ट्रिय खेलकुदबाट लामो दुरीमा होमिएकी उनले सागमा रजत दिदै चर्चा बटुलेकी थिइन् । २०६९ सालमा लुम्बिनी च्याम्पियनसिपमा म्याराथनमा स्वर्ण जितेसंगै पुष्पा सशश्त्र प्रहरी बलको एपिएफमा आबद्ध भएकी थिइन् ।