दिक्षान्स खड्का, हेटौडा

हेटौंडा उममहानगरपालिका ५ स्थित क्याम्पाडाँडामा निर्माण सुरु गरिएको एकवर्षमै मिनी रंगशाला तयार भएको छ । पिप्ले युवा क्लबको अगुवाइमा निर्माण भएको पिप्ले क्याम्पा रंगशालाको शुक्रबार हेटौंडा उपमहानगरका मेयर हरिबहादुर महत र वडाअध्यक्ष राजेश बानियाँले उद्घाटन गरेका छन् ।

पूर्व राष्ट्रिय बक्सिङ खेलाडी तथा क्लब अध्यक्ष सुशील घिमिरेको पहलमा स्थानीय व्यक्तिको सहयोगमा रंगशाला निर्माण अभियान सुरु गरिएको थियो । रंगशाला निर्माणका लागि सहयोगी संघसंस्था तथा व्यक्तिहरुले पनि आवश्यक सघाउ पु¥याएका थिए । करिब पौने २ करोडमा रंगशाला निर्माण गरिएको क्लबका अध्यक्ष घिमिरेले जानकारी दिए ।

रंगशालामा हेटौंडा उपमहानगर र ५ नम्बर वडाबासीको तर्फबाट १ करोड ३९ लाख रुपैयाँ लगानी भएको छ । घिमिरले विभिन्न सहयोगी संस्था एवम् व्यक्तिहरुबाट पनि करिब ३० लाख रुपैयाँ सहयोग प्राप्त भएको बताए । रंगशालामा करिब ५ हजार दर्शक अट्ने प्यारापिट निर्माण गरिएको छ । उनका अनुसार २० हजार क्षमताको रंगशालानको रुपमा यसलाई विकास गरिनेछ ।

हेटौंडा फुटबल खेलाडी उत्पादनको हिसावले देशमै अग्रस्थानमा रहेको भएपनि रंगशालाको अभावमा यहाँ सञ्चालन हुने फुटबल प्रतियोगिताहरुमा दर्शकका लागि बाँसको अस्थायी प्यारफिटमा गर्नुपर्ने बाध्यता रहँदै आएको थियो । रंगशालामा फुटबलसहित एथलेटिक्सको ट्रयाक समेत निर्माण गरिएको छ ।

अब रंगशाला परिसरमै कभर्ड हल बनाउने योजना रहेको पनि अध्यक्ष घिमिरेले जानकारी दिए । बागमती खेलकुद परिषद्को आयोजनामा हुने हुने प्रदेश खेलकुदको उद्घाटन यहि पिप्ले क्याम्पा रंगशालामा हुनेछ ।