काठमाडौं (हाम्रो खेलकुद)– युवा तथा खेलकुद मन्त्रालयको खेलकुद महाशाखाको अब आउने प्रमुखले नै राष्ट्रिय खेलकुद परिषद् (राखेप) को कार्यकारी अधिकार प्राप्त गर्ने खेलकुद मन्त्री महेश्वरजंग गहतराजले बताएका छन् ।

कार्यकारी अधिकार तोकिएको तीन दिनमै सह सचिव कमलप्रसाद पोखरेलको सुरुवा भएपछि राखेपको कार्यकारी अधिकार प्राप्त अधिकारीका लागि केहि दिन अझै कुर्नुपर्ने भएको छ । मन्त्रालयको खेलकुद महाशाखाको प्रमुखलाई हामीले राखेपको कार्यकारी अधिकार प्रत्यायोजन गरेका हौं, मन्त्री गहतराजले भने,‘पोखरेल जीको सुरुवा भएको छ । अब महाशाखाको प्रमुख जो आउँछ राखेपको कार्यकारी उहाँले नै सम्हाल्नुहुनेछ । आइतबार सम्म को आउने टुंगो लाग्ने सम्भावना छ ।’

राखेपको सदस्य सचिवको बर्खास्ती र नियुक्तीको रिट सर्वोच्चमा विचाराधिन रहेकोले दुई महिनादेखि खेलकुदको अभिभावक संस्था नेतृत्व विहिन रहँदै आएको छ । गहतराजले माघ २६ गते मन्त्रीस्तरीय निर्णयबाट राखेप सदस्य सचिवले गर्ने सम्पूर्ण जिम्मेवारी निर्वाह गर्ने गरि पोखरेललाई अधिकार प्रत्यायोजना गरेका थिए । संघीय मामिला तथा सामन्य प्रशासन मन्त्रालयले माघ २८ गते सह सचिव पोखरेलको सुरुवा शिक्षा विज्ञान तथा प्रविधि मन्त्रालयमा सरुवा गरेको छ ।

सदस्य सचिव नहुँदा राखेपको आर्थिक तथा प्रशासनिक काम ठप्प भएको छ । कात्तिक १ गते तत्कालिन सदस्य सचिव रमेश सिलवाललाई बर्खास्त गरेको थियो । मन्त्रीपरिषद्ले कात्तिक १३ गते टंकलाल घिसिङलाई सदस्य सचिव नियुक्त गरेको थियो । सिलवालले त्यसका विरुद्धमा सर्वोच्चमा रिट दायर गरेका थिए । सर्वोच्चले मंसिरर २९ गते मन्त्रीपरिषदको पछिल्लो निर्णय कार्यान्वयन नगराउन भन्दै अन्तरकालिन अन्तरिम आदेश जारी गर्दै छलफलका लागि दुवैपक्षलाई बोलाएको थियो । तर, तीन पटक पेसी सरिसकेको छ । अर्को पेसी फागुन २ गतेका लागि तोकिएको बताएको छ ।