काठमाडौं (हाम्रो खेलकुद) – तत्कालन सुदूरपश्चिम खेलकुद विकास समितिका पूर्व अध्यक्ष साम्राज्यविक्रम पाँडेको अध्यक्षतामा नेपाल खेलकुद अनुसन्धान तथा प्रबर्धन प्रतिष्ठान(नेस्पो) गठन भएको छ ।

नेपाली खेलकुदमा वैज्ञानिक अनुसन्धान तथा खेलकुदलाई प्रवर्धन गर्ने उद्देश्यसहित नेस्पो गठन भएको बिहीबार आयोजित पत्रकार सम्मेलनमा जानकारी दिइयो । नेस्पोमा खेलकुदसँग सरोकार व्यक्ति तथा संस्थाहरुको संग्लनता रहेको छ ।

धनगढी एफसीका सञ्चालक सुवास शाही, कैलाली ब्याडमिन्टन संघका पूर्वअध्यक्ष महेश शाह, संघका पूर्व कोषाध्यक्ष दीपेन्द्र कुमार श्रेष्ठ, हिमालय कलेजकी निर्देशक संगीता सिलवाल, खेल अभियान्ता विकास सिंह, कोरियाको कोईमुङ विश्वविद्यालयका प्राध्यापक डा सिद्धार्थ विक्रम पाँडेलगायत संस्थामा आवद्ध रहेको बताइएको छ ।

‘जराबाट ओलम्पिक’ भन्ने मुल नारा रहेको संस्थाले खेलकुदमा समय सापेक्ष वैज्ञानिक तरिकाले अनुसन्धानात्मक र खेलविज्ञानको मर्म अनुसार योजनासहित विश्व खेलजगतसँग प्रतिस्पर्धी खेलाडी उत्पादनमा सरकारी तथा गैरसरकारी संस्था हरुसँग हातेमालो गर्दै अघि बढ्ने अभियान संस्थाको रहेको अध्यक्ष पाँडेले बताए।

नेस्पोले प्रचलित विभिन्न खेलकुद का साथै पर्वतीय तथा पर्यटकीय खेलकुदसमेतको अनुसन्धान, प्रबर्धन तथा प्रदर्शनमा सहयोग पुर्याउने, खेलकूद सम्बन्धि पाठ्य सामाग्रीहरु प्रकाशन, प्रशारण, वितरण कार्य गर्नुका साथै प्रतिभावान खेलाडीहरु को पहिचानमा सघाउ पुर्याउने लक्ष्य राखेको छ ।

त्यस्तै खेलकुदको मूल प्रवाहमा ल्याउने, वैज्ञानिक तरिकाले ग्रासरुटका खेलाडी उत्पादनमा सघाउ पुर्याउने, राष्ट्रिय तथा अन्तर्राष्ट्रिय खेलविज्ञ संग्लग्न गराई नियमित सेमिनार,गोष्ठी तथा तालिमको आयोजना गर्ने पनि नेस्पोको योजनामा रहेको बताइएको छ ।

नेस्पोका सदस्य सिद्धार्थविक्रम पाँडेले भने,‘आर्थिक कारणले पछाडि परेका प्रतिभाशाली खेलाडीहरु लाई पहिचान गरी भौतिक तथा आर्थिक सहयोगका लागि विभिन्न निकाय संग पहल गर्दै सहयोग जुटाउने र स्वदेश तथा विदेशमा तालिमको लागि पहल गर्ने, मुलुक भित्र र मुलुक बाहिर रहेका नयाँ पुराना अनुभवी खेलविज्ञ, खेलकर्मीहरुको सञ्जाल बनाई मुलुकको खेल विकासमा लाग्ने वातावरण तयार पार्ने लक्ष्य छ ।’