काठमाडौं (हाम्रो खेलकुद)– एपिएफ क्लबको महिला भलिबल टोलीका सफल पूर्व प्रशिक्षक ज्ञानेन्द्र विष्टको कोभिडका कारण शनिबार साँझ निधन भएको छ ।

नेपाल एपिएफ फुटबल क्लबका व्यवस्थापक समेत रहेका विष्टका समकालिन खेलाडी विजय केसीका अनुसार बलम्बुस्थित एपिएफ अस्पतालमा साँझ ६:५० बजे उनको मृत्यु भएको थियो । उनलाई भेन्टिलेटरमा राखेर उपचार गरिएको थियो ।

कोरोना संक्रमण भएपछि पुस १२ गते उनलाई एपिएफ अस्पतालमा भर्ना गरिएको थियो । टिकापुरका स्थायी बासिन्दा ४२ वर्षे विष्टलाई काठमाडौं ल्याउनु अघि ५ दिनसम्म कोहलपुर अस्पतालमा उपचारका लागि राखिएको थियो ।

नेपाल भलिबल संघले आयोजना गर्ने एनभिए अवार्डमा विष्ट लगातार तीन पटक उत्कृष्ट प्रशिक्षक चुनिएका थिए । २०७४ सालमा उनको प्रशिक्षणमा एपिएफको महिला टोलीले देशभर आयोजना भएका ११ वटा प्रतियोगितामध्ये ९ वटाको उपाधि जितेको थियो ।

एपिएफमा असई पदबाट दुई वर्षअघि अवकास पाएका विष्ट पछिल्लो समय टिकापुरस्थित घरमै बस्दै आएको पनि केसीले जानकारी दिए । टिकापुर नगरपालिका कैलालीमा रहेको टिकापुर भलिबल ट्रेनिङ सेन्टरका प्रशिक्षकको रुपमा उनी कार्यरत रहँदै आएका थिए । २०६० सालमा आफूहरु एपिएफको पहिलो ब्याचको खेलाडीका रुपमा राष्ट्रिय प्रतियोगिता खेलेको केसीले स्मरण गरे । विष्टका श्रीमती र २ छोरा छन् ।