सेन्ट्रल जोन भलिबल – श्रीलंकालाई हराउँदै नेपालको विजयी सुरुवात

काठमाडौं (हाम्रो खेलकुद) – साविक विजेता नेपालले बंगलादेशमा बिहीबारदेखि शुरु भएको एभिसी एसियन सेन्ट्रल जोन महिला तथा पुरुष भलिबल च्याम्पियनसिपमा विजयी सुरुवात गरेको छ ।

नेपालले श्रीलंकामाथि ३–२ को रोमाञ्चक पूनरागमन जित निकाल्दै विजयी शुरुवात गरेको हो । ढाका मिरपुरस्थित शाहिद शुरवार्दी इन्डोर स्टेडियममा बिहीबार भएको खेलमा शुरुवाती दुई सेट गुमाएपनि उत्कृष्ट पूनरागमन गर्दै त्यसपछिको तीनै सेट आफ्नो पक्षमा पार्दै जित निकाल्न सफल भएको हो ।

पहिलो सेट १९–२५ ले गुमाएको नेपालले दोस्रो सेट पनि २१–२५ ले गुमाउन पुगेको थियो । तेस्रो सेटमा २५–१५ को सहज जित निकाल्दै नेपाल खेलमा फर्किएको थियो । चौथो सेटमा सुरुवातमा पछि परेपनि नेपालले पूनरागमन गर्दै २५–१९ ले जित निकाल्न सफल भयो । रोमाञ्चक र प्रतिस्पर्धात्मक बनेको पाँचौ तथा निर्णायक सेटमा १५–१३ को जित निकाल्न सफल भयो ।

अब नेपाली महिला टोलीले २४ डिसेम्वरमा माल्दिभ्ससँग खेल्नेछ । २५ डिसेम्वरमा घरेलु टोली बंगलादेशसँग तथा लिगको अन्तिम खेलमा उज्वेकिस्तानसँग खेल्ने तालिका छ । लिगकम नकआउट चरणपछि शीर्ष दुई टोलीले फाइनल खेल्नेछ । तेस्रो र चौथोले २८ डिसेम्वरमा तेस्रो र चौथो स्थानको लागि खेल्नेछ । पुरुष र महिलाको फाइनल २९ डिसेम्वरमा हुनेछ ।