काठमाडौं (हाम्रो खेलकुद) – नेपाली सुनमाया बुढाले थाइल्यान्डमा भएको एसियाकै ठूलो अल्ट्रा ट्रेल रनिङको उपाधि जितेकी छिन् । २ हजार भन्दा बढीले भाग लिएको ट्रेलमा सुनमाया महिलातर्फ विजेता र समग्रमा तेस्रो स्थान प्राप्त गरेकी हुन् ।

१ सय १० किलोमिटर अल्ट्रा दौड सुनमायाले १४ घन्टा ५४ मिनेट ०१ सेकेन्डमा दौड पूरा गरेकी थिइन् । सोहि विधामा अर्के नेपाली मिरा राई दोस्रो स्थान प्राप्त गरिन् । मिराले १७ घन्टा १२ मिनेट ४८ सेकेन्डमा पूरा गरेकी थिइन् । थाइल्यान्डकी पिचोमाने राक्सकुलले २३ घन्टा ५४ मिनेट ४८ सेकेन्डमा दौडा पूरा गर्दै तेस्रो स्थान प्राप्त गरिन् ।

सुनमायाले उपाधिसँगै ५० हजार भाट (झन्डै १ लाख ८० हजार नेपाली रुपैयाँ) पुरस्कार प्राप्त गरिन् । उनी द नर्थ फेस एडभेन्चर टिमसँग आबद्ध रहँदै आएकी छिन् । त्यस्तै दोस्रो भएकी मिराले ४० हजार भाट (झन्डै १ लाख ४५ हजार नेपाली रुपैयाँ) पाइन् ।

सुनमायाले मिरालाई झन्डै २ घण्टाले पछि पारेकी थिइन् । उनी पुरुषतर्फ दोस्रा भएका सेड्रिक गोलेयाभन्दा मात्र ४ सेकेन्डले पछि रहेकी थिइन् । उनले अन्तिम १ किलोमिटरमा सेड्रिकलाई कडा चुनौती दिएकी थिइन् ।

सुनमायाले जितपछि आफ्नो टोलीको निरन्तर साथको कारण यो सम्भव भएको बताइन् । ‘म निकै खुसी छु । मैले आफ्नो उत्कृष्ट प्रदर्शन गरें र यसको कारण मेरा सहकर्मीको निरन्तर समर्थन र साथ थियो । म मेरो नयाँ प्रायोजक द नर्थ फेस र कोरोसका साथै मलाई साथ दिनुहुने सबैलाई धन्यवाद भन्न चाहन्छु,’ उनले भनिन् ।