प्रकाश तिमल्सिना, काठमाडौं

सर्वोच्च अदालतले गत महिना मन्त्री परिषद्बाट बर्खास्त गरिएका राष्ट्रिय खेलकुद परिषद् (राखेप)का तत्कालिन सदस्य सचिव रमेशकुमार सिलवाललाई पूर्नवहाली गर्न अन्तरिम आदेश दिएको छ ।

मन्त्रीपरिषद्ले कात्तिक १ गते सिलवाललाई स्पष्टिकरण चित्त बुझ्दो नभएको भन्दै बर्खास्त गरेको थियो । त्यसका विरुद्धमा सिलवाल सर्वोच्च गएका थिए । न्यायाधिश हरि फुयालको एकल इजलासले बुधबार सिलवाललाई पुरानै अवस्थामा काममा फर्कन आदेश दिएको हो । आफूलाई काममा फर्कन र त्यसपछि राखेप सदस्य सचिव नियुक्त भएका टंकलाल घिसिङलाई काम नगर्न आदेश भएको छ, आदेश बारे जानकारी दिदै सिलवालले भने ।

सिलवाललाई बर्खास्त गरेपछि युवा तथा खेलकुद मन्त्री महेश्वर जंग गहतराजको सिफारिसमा मंसिर १३ गतेको मन्त्रीपरिषद् बैठकले घिसिङलाई सदस्य सचिव नियुक्त गरेको थियो । राष्ट्रिय खेलकुद विकास ऐन २०७७ का आधारमा भएको राखेप सदस्य सचिवको बर्खास्तका विषयमा पहिलो पटक सर्वोच्चमा रिट परेको हो । केपी ओलीको नेतृत्वमा रहेको सरकारले सिलवाललाई गत वर्ष साउनमा सदस्य सचिव नियुक्त गरेको थियो ।

ओली नेतृत्वको सरकारमा नियुक्त भएका ९ सदस्यलाई पनि गहतराजले पद मुक्त गरि ८ जना नयाँ सदस्य नियुक्त गरेका थिए । त्यो निर्णय विरुद्ध पनि तत्कालिन ५ जना सदस्य सर्वोच्च गएका थिए । २०७१ सालमा तत्कालिन युवा तथा खेलकुद मन्त्री पुरुषोत्तम पौडेलले तत्कालिन सदस्य सचिव युवराज लामालाई पदमुक्त गर्दा पनि सर्वोच्चले पूर्नबहाली गरेको थियो ।