काठमाडौं (हाम्रो खेलकुद) – एसियाली युथ पारा गेम्सका पदक विजेता तेक्वान्दो खेलाडीसहितको टोली मंगलबार स्वदेश फर्किएको छ । बहराइनको मानामामा सम्पन्न एसियाली युथ पारामा २ खेलका ४ नेपाली खेलाडीले प्रतिस्पर्धा गरेका थिए ।

तेक्वान्दोका सहभागी तीनै खेलाडीले पदक जितेका थिए भने ब्याडमिन्टनका १ खेलाडीले प्रतियोगितामा भाग लिएका थिए । टोकियो पारा ओलम्पियन तेक्वान्दोकी पलेशा गोबद्र्धनले स्वर्ण, सिर्जना घिसिङले रजत र विशाल गर्बुजाले कांस्य पदक जितेकी थिइन् । ब्याडमिन्टनका एक्लो सहभागी प्रकाश अधिकारी पनि पदक नजिक पुगेका थिए । उनले क्वाटरफाइनल यात्रा तय गरेका थिए । क्वाटरफाइनलमा प्रकाश दक्षिण कोरियाका खेलाडीसंग पराजित भएपछि पदकबाट चुके ।

पारा तेक्वान्दो प्रशिक्षकमा अन्तर्राष्ट्रिय लेभल– २ प्रशिक्षक कविराज नेगी लामा र टोली नेतामा राष्ट्रिय खेलकुद परिषद् (राखेप) सदस्य नन्दा बस्याल गेम्समा सहभागी थिए । त्रिभुवन अन्तर्राष्ट्रिय विमानस्थलमा स्वागतपछि पलेशाले टोकियो पारा ओलम्पिकको सहभागिता र तयारीको अनुभवले युथ पारा गेम्समा पदक जित्न ठूलो सहयोग गरेको बताउदै सहयोगी सबैप्रति अभार प्रकट गर्दै धन्यवाद दिइन् ।

टोलीलाई राखेपका सदस्य एकेन्द्र कुँवर, नेपाल तेक्वान्दोका संघका अध्यक्ष प्रकाशशमशेर राणा, महासचिव दीपराज गुरुङ, नेपाल खेलकुद महासंघका अध्यक्ष रमेश पौडेल, उपाध्यक्ष सुभाष श्रेष्ठ, ओलम्पियन दीपक विष्ट, परिवारजन, खेलाडीलगायतले स्वागत गरेका थिए ।