काठमाडौं (हाम्रो खेलकुद)– १३ औं दक्षिण एसियाली खेलकुद (साग) मा करातेका दोहोरो स्वर्ण पदक विजेता मण्डेकाजी श्रेष्ठलाई रुस्लान थ्री स्टार क्लबका कोषाध्यक्ष राम श्रेष्ठ बोसले पुरस्कृत गरेका छन् ।

देशका दुई स्वर्ण जितेको भन्दै श्रेष्ठले मण्डेकाजीलाई शुक्रबार प्रोत्साहन स्वरुप ५० हजार रुपैयाँबाट पुरस्कृत गरेका हुन् । उनले मण्डे बस्दै आएको होटल पुगेर चेक हस्तान्तरण गरेका हुन् । मण्डले सोमबार एकल र टिम कातामा स्वर्ण पदक जितेका थिए । जारी १३ औं सागमा दोहोरो स्वर्ण पदक जित्ने मण्डे र तेक्वान्दोकी आयशा शाक्य हुन् ।

आठौं सागपछि नेपालले यसपटक तेक्वान्दो र करातेमा ठूलो सफलता हात पारेको हो । करातले १० र तेक्वान्दोले १२ स्वर्ण पदक जितेका छन् ।
आठौं सागमा कराते र तेक्वान्दोले समान १४ स्वर्ण पदक जितेका थियो । नेपालले स्वर्ण पदकमा यसअघिको कीर्तिमानलाई तोडेको छ । सन् १९९९ मा भएको आठौंमा ३१ स्वर्ण जितेको नेपालले १३ औं सागमा बिहीबारसम्म ३६ स्वर्ण पदक जित्दै आएका छन् ।