काठमाडौं (हाम्रो खेलकुद)– यसै महिना आयोजना हुने ५० औं राष्ट्रिय कराते प्रतियोगितालाई ललितपुर मंगलबजारको सम्झना लेब्रोटरी क्लिनिक प्रालिले मुख्य प्रायोजना गरेको छ । आज राजधानीमा आयोजित कार्यक्रममा नेपाल कराते महासंघका अध्यक्ष दावा गुरुङ र सम्झना लेब्रोटरीका अध्यक्ष उर्दिप जोशीले मुख्य प्रायोजन सम्झौता पत्रमा हस्ताक्षर गरेका हुन् ।

अब प्रतियोगिताको नाम सम्झना ल्याब ५० औं राष्ट्रिय खेलकुद प्रतियोगिता रहने बताइएको छ । कात्तिक २३ देखि २५ गते सम्म राष्ट्रिय खेलकुद परिष्दको कभर्ड हलमा हुने प्रतियोगिताका लागि सम्झना ल्याबले ८ लाख ५० हजार रुपैयाँ नगद सहित झन्डै १५ लाख रुपैयाँ बराबरको प्रायोजन गर्ने प्रतियोगिता संयोजक दीपक श्रेष्ठले जानकारी दिए ।

प्रतियोगिताभर सम्झना ल्याबले उपचार टोली र आकस्मिक सेवाका लागि एम्बुलेसनको व्यवस्था गर्नेछ सम्झौतामा उल्लेख छ । त्यस्तै सम्झना ल्याब ५० औं राष्ट्रिय कराते प्रतियोगिता बाट छनोट भइ राष्ट्रिय टोलीमा पर्ने २३ खेलाडीलाई अर्को वर्ष आयोजना हुने १८ औं एसियाली खेलकुदसम्म सम्झना ल्याबले निशुल्क ल्याब टेस्ट गर्नेछ । त्यस्तै एसियाड सम्म २३ खेलाडीलाई सम्झना ल्याबले दुई सेट खेल समाग्री उपलब्ध गराउने बताइएको छ । कराते महासंघले प्रतियोगिताका दौरान सम्झना लेब्रोटरीको प्रचार प्रसार गर्नेछ ।

करातेमा स्तरीय खेलाडी उत्पादन र नेपालले आउने दिनमा सहभागिता जनाउने अन्तर्राष्ट्रिय प्रतियोगितामा भाग लिने खेलाडी तयार पार्नका लागि यो राष्ट्रिय प्रतियोगिता महत्वपूर्ण हुने हामीले विश्वास लिएको संयोजक श्रेष्ठले बताए ।

अर्को बर्ष आयोजना हुने एसियाली खेलकुद, सन् २०१९ मा नेपालमै आयोजना हुने १३ औं दक्षिण एसियाली खेलकुद र सन् २०२० को ओलम्पिकलाई समेत ध्यानमा राख्दै खेलाडीलाई तयार पार्ने उद्देश्य साथ प्रतियोगिता आयोजना गर्न लागिएको बताइएको छ ।

प्रतियोगितामा ५ विकास क्षेत्र, तीन विभाग (त्रिभुवन आर्मी क्लब, नेपाल प्रहरी क्लब र नेपाल एपिएफ क्लब) गरि ८ टोलीका बढीमा १ सय ८४ खेलाडीले प्रतिस्पर्धा गर्नेछन् । च्याम्पियनसिपमा महिला र पुरुषका तौल समूह, एकल र टिम कातामा प्रतिस्पर्धा हुनेछ । त्यस्तै महिला र पुरुषको टिम फाइट पनि समावेश गरिएको छ ।

प्रतियोगितामा महिलाका ७ तौल समूह र पुरुषका ८ तौल समूह तथा दुवैतर्फ एकल र टिम काताको प्रतिस्पर्धा हुनेछ । हरेक टोलीबाट तौल समूहमा एक एक जना र कातामा गरि बढीमा २३ खेलाडीले भाग लिन पाउनेछन् । प्रतियोगिताबाट उत्कृष्ट प्रदर्शन गर्ने २३ खेलाडीलाई राष्ट्रिय टोलीमा छनोट हुने महासंघले जानकारी दिएको छ ।

प्रतियोगितालाई सञ्चालनमा झन्डै २९ लाख रुपैयाँ खर्च हुने अनुमान गरिएको प्रतियोगिताको डिस होम एक्सन स्पोर्टस्ले प्रत्यक्ष प्रसारण गर्ने कार्यक्रममा जानकारी गराइयो ।

सम्झना ल्याब ५० औं राष्ट्रिय कराते प्रतियोगितामा समावेश गरिएका इभेन्ट

महिला – ४० केजी मूनि, ४५ केजी मूनि, ५० केजी मूनी,५५ केजी मुनी, ६८ केजी मूनी र ६८ केजी माथि
पुरुष – ४५ केजी मूनि, ५० केजी मूनी, ५५ केजी मूनी, ६० केजी मूनी,६७ केजी मूनी,७५ केजी मूनी,८४ केजी मूनी र ८४ केजी माथि
महिला/पुरुष – एकल काता, टिम काता
महिला/पुरुष – टिम फाइट