काठमाडौं (हाम्रो खेलकुद) – नेपाल कराते महासंघको आयोजनामा राष्ट्रिय कराते प्रतियोगिता कात्तिक चौथो साता हुने भएको छ ।आयोजक नेपाल कराते महासंघले बुधबार पत्रकार सम्मेलनको आयोजना गर्दै ५० औं संस्करणको राष्ट्रिय कराते प्रतियोगिता आउदो कात्तिक २३ गतेदेखि २५ गतेसम्म तीन दिन प्रतियोगिता हुने जानकारी गराएको हो ।

करातेको राष्ट्रिय टिम निर्माणको तयारीको रुपमा यस प्रतियोगितालाई हेरिएको प्रतियोगिता संयोजक दीपक श्रेष्ठले जानकारी गराए । यस प्रतियोगितालाई सन् २०१८ मा आयोजना हुने एसियाली खेलकुद, सन् २०१९ मा नेपालमै आयोजना हुने १३ औं दक्षिण एसियाली खेलकुद र सन् २०२० मा जापानमा आयोजना हुने टोकियो ओलम्पिकलाई ध्यानमा राखेर राष्ट्रिय टिम निर्माणको लागि खेलाडी छनोटको रुपमा रहेको संयोजक श्रेष्ठले जानकारी गराए ।

तीन दिनसम्म चल्ने प्रतियोगितामा सात प्रदेश र तीन विभागीय टोली  त्रिभुवन आर्मी क्लब, नेपाल पुलिस क्लब र नेपाल एपिएफ क्लब गरी १० टिमको सहभागिता रहनेछ । जसमा पुरुष ११० र महिला १०० गरी २१० खेलाडीले प्रतिस्पर्धा गर्नेछ । प्रतियोगितामा पुरुषतर्फ सात, महिलातर्फ छ र दुवैतर्फ एकल र टिम कातामा प्रतिस्पर्धा हुनेछ । यस प्रतियोगिताबाट २१ जना राष्ट्रिय कराते टिमका लागि छनोट हुनेछ ।

नेपाल कराते महासंघका अध्यक्ष दावा गुरुङले सात प्रदेशमा छनोट प्रतियोगिता हुने र छानिएका खेलाडीले यस प्रतियोगितामा सहभागिता जनाउन पाउने बताएका छन् । अहिले राष्ट्रिय टिममा रहेका खेलाडीहरुले पनि छनोट खेल्नुपर्ने अध्यक्ष गुरुङले बताए ।

प्रतियोगितामा पुरुषतर्फ ५० केजीमुनि, ६० केजीमुनि, ६७ केजीमुनि, ७५ केजीमुनि, ८४ केजीमुनि र ८४ केजीमाथि रहेका छन् । यस्तै महिलातर्फ ४५ केजीमुनि, ५० केजीमुनि, ५५ केजीमुनि, ६१ केजीमुनि, ६८ केजीमुनि र ६८ केजीमाथि रहेका छन् । महिला र पुरुष दुवैमा एकल काता र टिम काता रहेका छन् ।